[dropcap]М[/dropcap]артрал 10-нний, «Молодежь Дагестана» кказитрал редакциялий чIумуйну тIивтIусса пунктрай, республикалул журналистурал оьтту буллунни антитела дусса-дакъасса кIул баву мурадрай. Республикалул оьтту булаврил станциялул зузалтрал 100-нния ливчусса журналистурал оьттуву коронавирусрайн данди дацIансса антитела ххал дунни. Ва кьини вайннавух бия «Илчи» кказитрал цинявппа журналисталгу. Антитела кIул дуллалисса тестирдал жавабру дучIантIиссар оьтту буллуну хъиривмур кьини.

[dropcap]Ш[/dropcap]иккува кIицI лаган, оьттуву антитела ду-дакъашиву кIул буллалисса анализрайн бувну, исват хьунтIиссар цIунилгу коронавирусрал инфекция зуйннагу, мачча-гъаннайнгу лахъан­сса цуксса нигьачIаву дуссарив. Вай анализру дулаврил цуксса хъуннасса жаваблувшиву ду­ссарив бувчIлачIисса журналистал бия антитела кIул дурну махъ вакцинартту бан хIадурну бушиву буслай.

Жула республикалий, цайми регионнах бурувгун, агьали бур вакцинартту баврил агьамшиву дурчIлай, прививкартту дуллай байбивхьуну. КIицI лаганну, вакцинартту цала хушрай буллалишиву. ХьхьичI ххуттай вакцинартту баврил ирглий бур хIакинтал, учительтал, социал идарарттал ва ихтиярду дуруччай органнал зузалт. Вай бур чIявусса халкьуннащал зий, мунияту хъунна­сса нигьачIавугу дур азар ла­хъансса.

Республикалул журналистурава цалчин «ковидрал» вакцина бувминнавасса ца хьунни «Илчи» кказитрал хъунама редакторнал хъиривчу Руслан Къардашов. Ванал бувсунни вакцина бан хьхьичI полик­линикалий хIакин-терапевтнал, хъирив лавну, цува ххал ивгьушиву.