МахIачкъалалив
МахIачкъалалив Оьруснал театрданул залдануву хьунни Росгвардиялул Ухссавнил Ккавкказуллал округрал Балайрдал ва къавтIаврил ансамбльданул концерт.
Ансамбльданул художествалул каялувчи ур подполковник Василий Бурмистров. Аьрали артистурал щаллу бунни Аьрасатнал ва чил билаятирттал машгьурсса композитортурал балайрду, ккаккан дунни хореографиялул постановкартту.
Концерт къуртал хьуну махъ Дагъусттаннал культуралул министрнал кIанайсса Зарема Буттаевал барчаллагь увкунни артистурахь ххаллилсса концертрахлу ва жагьилми Ватан ххирану тарбия шаву мурадрай бихьлахьисса захIматрахлу. Ванил дуллунни артистуран Х1урматрал грамотартту. Василий Бурмистровлулгу барчаллагь увкунни республикалул каялувчитурахь, мукунма культуралул министрнал кIанайсса Зарема Буттаевахь концерт тIайла дуккан кабакьу бувну тIий. Цала чулуха ваналгу дуллунни Росгвардиялул Ухссавнил Ккавкказуллал округрал командованиялул чулухасса ХIурматрал грамотартту Зарема Буттаеван ва Оьруснал театрданул каялувчинан.
Каспийскалий
Росгвардия сакин хьуну 5 шин шаврицIун ва ихтиярду дуруччай аьралуннан 210 шин шаврицIун бавхIуну дуллалисса концертрал турданул лагрулий Росгвардиялул Ухссавнил Ккавкказуллал округрал Балайрдал ва къавтIаврил ансамбльданул ккаккан дунни ххаллилсса концертрал программа Каспийскаллал 11-мур гимназиялий.
Концерт ххал дан бувкIун бия Дагъусттаннал БакIчинал кIанайсса Сергей Меликов, кIанттул Росгвардиялул управлениялул хъунама, полициялул генерал-майор МахIаммад Баачилов, Каспийскаллал флотилиялул командующий, вице-адмирал Сергей Пинчук, Дагъусттаннал культуралул министрнал кIанайсса Зарема Буттаева, Каспийск шагьрулул бакIчи Борис Гонцов, Росгвардиялул зузалт, Каспийскаллал флотилиялул аьралитал, шагьрулул агьали.
Концертрал программалуву бия аьрали ва патриот балайрду, хореографиялул постановкартту. Сергей Меликовлул барчаллагь увкунни ансамбльданул коллективрахь авадансса программалухлу ва магьирлугъ хьхьичIуннай дан бихьлахьисса захIматрахлу. Цала ихтилатраву ванал кIицI лавгунни 5-7 шинал хьхьичI ансамбльданул сахIналийсса концертру чансса диркIшиву, вайннал хъунмурчIин концертру дулайсса диркIшиву аэродромирттал авлахъирттай, вертолетирттал майданнай, Дагъусттаннал, Ингушетиянал, Чачаннал зунттал районнай, хIасил ихтиярду дуруччай аьрали къуллугъ буллалисса кIанттурдай.
– Ансамбль аьрали коллективран ккалли бан бучIиссар. Вайннал пишакаршиврул даража шиная шинайн гьаз хъанай бур. ХIакьинусса кьини вайннал дуллай бур искусствалул усттартурал даражалийсса концертру. Ва коллектив цалчин бакъар Дагъусттаннайн бувкIсса. Гьар мудангу вайннал ккаккан дайссар концертру укра. ДакIнийхтуну барчаллагь тIий ура ансамбльданул коллективрахь, – увкунни Сергей Меликовлул.
Концерт къуртал хьуну махъ ванал дуллунни ансамбльданул артистуран ХIурматрал грамотартту.
КIива артисткан дуллунни «ДР-лул лайкь хьусса артист» тIисса бусравсса цIа.
