Дагъусттаннал Росгвардиялул управлениялул зузалтгу гьуртту хьунни Аьрасатнал Росгвардиялул дуллалисса «Росгвардиялул ветерантал» тIисса акциялуву. Акция баян бувну бур Росгвардия сакин хьуну 5 шин шаврицIун ва ихтиярду дуруччаврил аьралуннал гьану бивзун 210 шин шаврицIун бавхIуну. Акциялул лагрулий Дагъусттаннал Росгвардиялул Управлениялул зузалт ва аьралитал бивунни Буттал кIанттул цIанийсса Хъунмасса дяъвилул ва вневедомственный къаралданул ветеран Зайнуттин АсаповлучIан.
Ветераннал бувсунни хъамаллурахь дяъвилул шиннардий яла дакIний ливчIмуния, цинявппагу совет халкьуннал цачIу ларсъсса Ххувшаврия.
Къарабудахккантуллал райондалиясса Зайнуттиннул нину-ппу ва чIивину унава аьпалухьхьун лавгун бур. Ва хъуна увну ур ниттиуссил. Хъунмасса Буттал кIанттул цIанийсса дяъви байбивхьусса чIумал Зайнуттин хъуниминнащал архIал къинттуллух зий ивкIун ур.
1944 шинал 18 шинавусса жагьил, комсомол организациялул тIайла увккун, Къарабудахккантуллал РОНКВД-лий зун ивкIун ур.
Дяъвилул чIумал хьхьирил зуманивсса Ккавкказ хъуннасса агьамшиву дусса объектну бивкIссар. Ванийн ишан ларсъсса душманнал, диверсияртту дуллан ва кьюлтIмур кIул буллан, къинттуллухун чIявусса аьралитал бичлай бивкIссар. Цаймигу ватанлувтуращал Зайнуттиннулгу чялишсса гьурттушинна дурну дур ми группарду кIул бан.
Дяъви къуртал хьуну махъ ва зун ивкIун ур Дагъусттаннал виваллил иширттал структуралуву, рядовойнаяту айивхьуну, уголовный розыскрал ва МахIачкъалаллал вневедомственный къаралданул отделданул хъунаманайн ияннин.
Зайнуттин Асапов лайкь хьуну ур «За заслуги перед Отечеством» ва цаймигу медаллан, «За заслуги перед МВД» ордендалун, Дагъусттаннал ХIукуматрал ва МВД-лул чулухасса ХIурматрал грамотарттан. Ва ур Дагъусттаннал МВД-лул лайкь хьусса зузала, лайкь хьусса жагьилминнал насихIатчи.
ЦIана Зайнуттиннун 97 шин дур. Цала кулпатращал архIал ванал тарбия бувну бур 5 оьрчI. ХIакьину вайннал 14 оьрчIал оьрчI бур. Оьрмулул шиннардих къаурувгун, цувагу гъира-гьавас буну ур.
Ччя-ччяни хьунаакьай жагьи-жугьултращал. Ванал ичIува чан къашай хъамалгу.
