Цал ца-кIира калима хъярчру хIаласса данна. Утти­сса инсантурал, мюрщиминнал хьуннав, хъуниминнал хьуннав, дургьуну дур телефоннал, компьютердал, яруннайн лаххай­сса щяйтIантрах ябитлатисса задирттал «магъру». Ялагу, вай кIицI дурсса затру дакъа, «социальная сеть» тIиссагу дур ччиманал ччимур чичлачисса зат. Уттигъанну ттул янилун багьуна Дагъусттаннал телевидениялул хаварду бусай душ реклама нанисса мутталийгума телефон пикь-пикь тIутIи дурну. Га хавар бакъулий камералул лавсун бия. Ттул буттал, аьпабивул, Вихьуллал МахIатIулавхъал Шяъбаннул вай иширттайн Вихьуллал зумувну «Часима» учайва. «Часима» тIисса балайгума баллан бикIай ца яруссаннал хъамитайпалул тIий.

Цири вай иширттал тIутIисса? Вайннул буслай бур инсантал цIусса техникалул ясир буллай бушиву. Гьай-гьай, анаварну нанисса техникалул бущи жущава бацIан буван къахьунссар, бацIан буллансса аьркинлугъгу дакъар. Циван учирча, хIакьину сайки циняр давуртту цифрардал лагрулийн дичлай, электрон зумувну дачин дуллай буну тIий. Ва иширалгу жула оьрмулул аьркиншинну бигьану ва хъунна­сса чIун харж къадурнура биттур дуллай дур.

КIилчин, инсаннал оьрмулуву дур, цалами буруккин­тту бакъагу, цаймигу затру. Мукунсса затну хъанай дур жува яхъанахъисса кIанттурдал лагма­сса тIабиаьт. ТIабиаьтраллухха жува ябуллалисса, ссупралий дишинмургу ваниллихха дуллалисса. Мунияту ттун цIана бусан ччай бур, зулми дакIругу тирх учин дуван, ттула янилун багьсса ва ттула дакIний чичру дурсса, зунттавусса кIюрхнил ца лахIзалия.

Февраль барз дябивзсса чIун. На даврийн Ваччав нани­сса кIюрх. Шярава увккун, Майраялу тIисса кIанттайн ияйхту, янилун багьуна архну, Ваччиял шяраваллил ялув бавцIусса, ца чIивисса шархьттуруллул парча. Явара, чувчIав ттуруллул къурхъ дакъасса кIюрх дия. Цаппара манзил бивтун, Ххаралиялу тIисса кIанайн ияйхту, тана-та шархьттурлу хъунна хъанан диркIуна, Хъюйннал даралувун дияннин. ЧIалан бивкIуна, ча бувкссарив къакIулсса ттуруллул парчри Щуну-Зунттул хъачIурдих, баргълагавал чулий ва цаймигу кIанттурдай. Ургу яла ина, Щуну-Зунттуха чантIа тIий, яру тIитIлатIисса бургъил, гай ттуруллал вирдакIру цIарал къавтIирдайн дуккан дайсса куццух. Бувккун ттула фотоаппарат, чIярхтIи буллан ивкIссияв. Сурат­ру ххуйну хьуншиврул, хъирив хьуну, ххуллия чулинай увккун, ЦIийшиял чIаравсса «городищалул» кьунттайн лахълай, ласлай уссияв. Гьай-гьай, ттун дакIнийн багьлай бия ва язугъ хъанай бия шагьрурдайсса жула инсантурай. Циван? Циван бикIави, укунсса эмаратру, караматру гайннал янилун къадагьайсса дуну тIий. Дия цамургу ца ххаришиву ттулмур дакIниву – ттущара вай ххаришивуртту, аьжаившивуртту зияратран дишин бюхълай бушиву.

Оьруснал магьраву бикIай, на макьалалун цIа дирзсса, тIавуслелуххи. Ганил магърацIун лавчIманангу талихI шай, тIайлабацIу шай. Нагу му кьини ттуна нава тIавуслелуххул магърацIун лачIун бювхъусса инсанну чIалай ияв. Яраппий, зухьхьунгу лачIун бирияваннав тIавуслелуххул магърацIун ца лахIзалийсса бухьурчагу.
Ябитияра ва жула Ватандалул кIюрхнил лахIзардал суратирттахгу.