ХIакьину, мартрал 19-нний, ссят 12:00 хьуну, МахIачкъалалив, М. Горькийл цIанийсса Оьруснал драмалул театрданул хьхьичIсса майданнив хьунтIиссар Интнил фестиваль-байран. Му хьунтIиссар ДАССР сакин хьуну 100 шин шаврил шадлугъирттал лагрулий ва республикалул муниципалитетирттал гьурттушиврийну. Фестиваль-байрандалул сакиншинначиталну бур ДР-лул Культуралул министерство, Республикалул Халкьуннал творчествалул къатта/

Дагъусттаннал миллатирттал авадан­сса культуралуву интнил байрандалул ляличIийссава кIану бугьлагьиссар. Интнил байран дархIуну дур кIи тIайла дуккаврищал, тIабиаьт цIулагаврищал, къурнил давуртту дайдишаврищал. Гьарцагу миллатрал дур интнил байран хьунадакьаврил аьдат­рал цалла-цалла ляличIишивуртту. Дур интнил байрандалул цинявннан аьмсса ца лишангу – къавтIи. Мукунма аьрщи чантI учаврил, цIусса оьрмулул лишанну хъанахъисса ххяхлан бивкIсса къама бур интнил байрандалул ца бутIа.
Интнил байрандалийн бучIантIиссар Ахъушиял, Ах­ттиял, Агъуллал, Дарбантуллал, РутIуллал, Къаяккантуллал, Ккуллал, Нугъайнал, ТIиляратIиял, Табасараннал, Шамиллул, МахIарамккантуллал районная­сса, МахIачкъала, Хасавюрт шагьрурдаясса творчествалул коллективру ва таксса гьурттучитал, мукунма ПаччахIлугърал Азирбижаннал ва Табасараннал драмалул театрду, Нугъайнал фольклорданул ансамбль «Айланай».