ЦачIу – ца магъулу

ЦачIу – ца магъулу

Ларгсса ххуллункьини МахIачкъалалия арх бакъасса «Журавли» тIисса Элмулул ва цIуллу-сагъшиврул комплексраву хьунни январьданул 26-нний «Межконфессиональное согласие – залог постковидной реабилитации и духовного возрождения России» цIанилу хьунтIисса элмийсса конференциялун хасъсса мероприятие. Ваний гьуртту хьунни «Журавли» НОК-рал хъунама, МГУ-лул профессор МахIаммад МахIаммадов.


«Журавли» тIисса цIуллу-сагъшиврул
комплексрай хьунтIисса элмийсса
пресс-конференциялул хьунийн

Конференциялул сакиншинначитурал бувсунни январьданул 26-нний, гьурттучитал ва хъамал бавтIсса кьини, комплексрал хIаятраву тIитIинтIишиву ши­кку хъин хъанахъисса инсантурансса шаннагу диндалул центр «Мизит-Килиса-Синагога». Ва тIитIингу комплексрал каялувшиндаран дакIнийн багьну бур ларгсса гъинттул, ковидрал къашавай хьуну махъ, азарханалия бувккун, вайнначIан цалла цIуллу-сагъшиву цIакь дан бувкIсса агьалинах бурувгун, миннащал хьусса ихтилатругу хIисавравун лавсун.

Ларгсса гъинттул «Журавли» НОК-рал уква кьамул бувссар Аьрасатнал регионнаясса ковидрал азар лархъсса хIакинтал. Му акция шикку хьуссия «Слава врачам» тIисса цIанилу.
– Дунияллий ца яла машгьурсса шаннагу диндалул центр тIитIинсса пикри жувун багьуна, коронавирусрал азар лархъун, жучIан цалла цIуллу-сагъшиву цIакь дан бувкIсса агьалинал мурадирттах вичIи дирхьуну махъ. Аьжаивсса, дурчIин къашайсса азар диркIун дия му. «Зун шикку ци диял къахъанай дур?» – тIисса суал буллувкун, агьалинал жухь чIявуну тикрал байсса махъру бия: «Азардания махъ дакIниву дунияллийн умуд бишинсса цичIар къаляркъунни»,– тIисса. Вана ва иширайн бувну, шиккун личIи-личIисса диннал инсантал бучIайсса буну тIий, жу пикри барду мизитгу, килисагу, синагогагу цачIусса, ца магъулусса «ЦачIуншиву» тIисса центр тIитIин,– кунни цала ихтилатраву МахIаммад МахIаммадовлул.

Ванал бусаврийну, конференциялийн хIадур хъанай, вай хьунабавкьуну бур жулла республикалийсса шаннагу диндалул идарарттал вакилтуращал.
Конференциялий онлайн ва офлайн режимирттай гьур­тту хьунтIиссар 70-нниха ливчусса, жула шиччассагу, билаятрал цайми шагьрурдаяссагу, хIакинтал ва аьлимтал. Шикку ххал бигьинтIисса ихтилатругу, хъунмурчIин, хьунтIиссар ттизаманнул медициналуву ковидрал азар хъин дан ишла дуллалисса каширдая, му азарданул инсаннал чурххайн биян буллалисса зараллая ва хъин хьуну махъ инсантуран хIукуматрал даражалий цукунсса кумаг бан аьркинну буссарив бусаврия. Сакиншинначитурал мукунма кIицI бунни конференциялий мюнпатсса ихтилатру хьунтIишиву, ца медициналул сфералул зузалтран бакъассагу, элмийсса аралуву ва диннал идарарттай зузиминнангу.

Читайте также: