Агьалинал къайгъурдахсса къулагъас

[dropcap]Я[/dropcap]нварь зурул 15-нний Да­гъусттаннал региондалийсса «Единая Россия» партиялул отделениялул приемнайлуву АьФ-лул ПаччахIлугърал Думалул депутат Аьвдулмажид МахIрамовлул агьалинащал­сса ирглийсса манзилданул режимрайсса хьунабакьаву хьунни. Ва кьини депутатнал вичIи дирхьунни республикалул шагьрурдай ва районнай ялапар хъанахъисса агьалинал масъаларттах.


Цалчин депутатнайн оьвкунни ЦIунтIиннал райондалий ялапар хъанахъисса хъамитайпалул, цила душнин даву лякъин кумаг баврил хIакъираву. Ванил бувсунни 2020 шинал цила душнил Наида Иманаьлиевал къуртал бувшиву Приволжскаллал медициналул ахттаршиннарду даврил университетрал медико-профилактический факультет. Дуккаву къуртал дурния шинмай Наида зий бивкIун бур коронавирусрал инфекциялул къашай хьусса инсантал хъин буллалисса, яла нигьачIаву думур «ятIул зоналий», «Волонтер-медиктуравух» Нижний Новгород шагьрулийсса Н.А. Семашкол цIанийсса азарханалий оториноларингологиялул отделениялий санитаркану.

Дагъусттаннайн бувкIун махъ Наида, даврийн кьамул бара тIий, бивну бур цикссагу медициналул идарарттайн, амма ванища даву лякъин хьуну дакъар. МахIрамовлул, ванин даву лякъин бюхъаншиврул, резюме хIадур дурну, цалла электрон адресрайн тIайла дуккияра увкунни.

«Научный городок» микрорайондалий ялапар хъана­хъисса агьалинал цIания Юрий Яковлевлул оьвкунни, инсантал бигьалаган, сайрданий занан­сса сквер-парк баврил масъала дузрайн буккан бан кумаг бара тIисса миннатрай. Шикку ялапар хъанахъисса агьалинал бусаврийн бувну, сквер-парк бансса аьрщив дусса дур АьФ-лул КIулшивуртту дулаврил министерствалул биялдарай.
— МахIачкъалаллал шагьрулул администрациялул агьалинан парк бансса ихтияр тIалав дуллалисса аьрза чивчуну буссия АьФ-лул кIулшивуртту дулаврил министерствалийн. Мукьрахъул шиннардил мутталий ва райондалий ялапар хъана­хъисса агьали парк-сквер баврил масъала дузрайн буккан бан къахъанай ливчIун бур, – тIий буслай ур Юрий. Депутатнал тIалавшиндарайн бувну, ванил хIакъираву чагъар чичинсса хIукму бунни АьФ-лул КIулшивуртту дулаврил министерствалийн.

БежтIиял шяравасса Шамил МахIаммадовлул оьвкунни депутатнайн цIуллу-сагъшиврул мушакъатшиву дусса 2 шинавусса цала арс Москавливсса клиникалий хъин хьун гьан аврил хIакъираву. Ванал бувсунни цала арс 2020 шинал октябрь зуруй гьан уллай ивкIшиву Н.И.Пироговлул цIанийсса НМХЦ центрданийн. Вайннаща тIурча, кутIасса чIумул мутталий документру дузал бан къавхьуну, азарханалийн гьан бювхъуну бакъар. Ппу нигьа увсун ур, хъунмасса хIаллай ялугьлан багьарчан, оьрчIал тагьар оьнийн дагьанссар тIий. Ва масъалагу МахIрамовлул лавсунни бакIрайн ва ДР-лул ЦIуллу-сагъшиву дуруччаврил министерствалийн тапшур бунни анаварсса мутталий дузал баву.

БежтIиннал школалул директор Аминат ХIасан-ХIажиевал оьвкунни шяравусса школа цIубуккан баврил ва шикку ремонт дан кумаг баврил хIакъираву. Ванил бувсунни школалул къатри хъинну нигьачIисса тагьарданий бушиву, зия хьуну душиву отопление, электропроводка, дух хьуну, ишла дан къашайсса кIанайн дирну душиву мебель. Ва ма­съалалул хIакъираву школалул дирекция бувккун бур республикалул личIи-личIисса идарарттайн, амма цичIар даххана дан хьуну бакъар. Депутатнал, ва масъалалул хIакъираву Республикалул ХIукуматрайн аьрза чивчуну, дузал бан бакIрайн лавсунни.

Агъуллал райондалул администрациялул бакIчи Закир Каидовлул оьвкунни культуралул идаралул къатри цIу буккан бан кумаг баврил ва райондалул агьалинансса Спортрал ва цIуллу-сагъшиву дуруччаврил центрданул къатри баврил масъаларттал хIакъираву. Райондалул бакIчинал бувсунни вай масъалартту ссуссукьусса райондалул бюджетраща дузрайн бу­ккан бан захIмат хъанай бушиву. Депутатнал цала кумагчинайн тапшур бунни ва масъалалул хIакъираву хасъсса аьрза чичин Дагъусттаннал КIулшивуртту дулаврил ва элмулул министерствалийн.
Ва кьини, вай бакъасса, цаймигу масъалартту ххал бивгьунни ва ми щаллу баврил ялув ацIаву бакIрайн лавсунни Аьвдулмажид МахIрамовлул.