[dropcap]В[/dropcap]а яла ларгсса дуккаврил шин къабигьасса, уттинин кIулшивурттал аралуву зузиминнал дакIний-мазрайрагу къадиркIсса, мартрал ахирданийва цанная ца ят буцан бувну, сентябрьданийннин учительтал оьрчIах, оьрчIру учительтурах мякь буккан бувсса хьунни. Ухссавнил Ккавкказнаву ца яла хъунмасса тарих бусса, гьарца шинах азарахъул учительтал хIадур байсса Дагъусттаннал КIулшивуртту лядуккаврил институтрангу багьунни къабигьасса шартIирдай зун.
ЦIана му институтрал ректорнал бигарду чIумуйну биттур буллай ур социал элмурдал доктор, ДР-лул дуккаврил лайкь хьусса зузала, профессор, МахIаммадгъазинал арс Жамалуттинов ХIамзат. Гьарца аралуву шинал ахирданий хIасиллу дайсса аьдатгу духьувкун, республикалул школарттай зузиминнал цIания жугу цаппара суаллу буларду жущала хьунаакьин чIун ляркъусса ХIамзатлухьхьун.
– ХIамзат МахIаммадгъазиевич, зул институтрал даврий цукун асар хьур ларгмур дуккаврил шиналсса захIматшивуртту? Цукун буклай буру цIусса шинайн?
– Гьай-гьай, жу дан дакIний бивкIсса чIярусса давурттахунгу дахчунни пандемиялул тагьар. Очнайну ва заочнайну байбишинсса учительтурансса курсру дистанциялул низамрай щаллу барду. Педагогтурал кIулшивурттал даража лахъ баву дакъасса, жул институтрал биялалий дуссар конкурсругу, олимпиадарттугу, форумругу, конференцияртту ва семинардугу. Вай цимурца дан багьунни мукунна манзилданул низамрай. ВайннуцIун жу дуварду хIукуматрал жуятура тIалавсса 10 азара учительнал кIулшивурттал даража лахъ баврилмур давугу. ДИРО гьар шинах гьуртту шайссия федерал ва регионал даражалул проектирдавухгу.
[dropcap]М[/dropcap]у даву жунна ччисса куццуй къащаллу хьуну лирчIунни. 2019 шинах бурувгун, ва ларгмур шинал жул институтрал хъунмур къулагъас дуссия дурну тарбиялулмур даврих. Масалдаран, дуллай бивкIссар лахъми классирттал оьрчIал ва миннал нитти-буттал дянивсса арардал мониторингру ва экстремизмалул, терроризмалул хIакъиравусса профилактикалул давуртту. Мукунна 7-9-ми классирттал оьрчIащал дурссар личIи-личIисса масъаларттал хъирив лаянсса психолого-педагогикалул тестру. Вай давурттугу жу дуварду Муфтиятрал ва низам дуруччай къуллугъирттал вакилтурайнгу оьвкуну.
– ЦIусса шинал ссаха зун дакIний буру?
– ЦIумур шинал жул даву дархIуну дикIантIиссар методикалул, психолого-педагогикалул ва коммуникациялул масъалартту щаллу баврицIун. Учительтурал кIулшивурттал даража лахъ байсса курсру бикIантIиссар гьарцаннал цанма-цанмалу цIа увкусса. Масалдаран, кIулшивуртту дулаврил идарарттал каялувчитуран дарсирдал планну сакин дан лахьхьин буллалисса курсру бикIантIиссар. Микку миннан лахьхьин бантIиссар цала-цала школарттай Дагъусттаннал тарихрал, Дагъусттаннал географиялул, КТНД-лул, дагъусттаннал литературалул ва цаймигу дарсирдан цуми планну ишла дурну хъинссарив; кIулшивуртту дулаврил идарарттай лябукку бикIаншиврул цукунсса программарду сакин дантIиссарив; экстремизмалийн ва терроризмалийн къаршисса программарду щурущи дантIиссарив.
Умуд бишин ччай бур ялун дуркIсса цIусса шинал COVID-рал азаргу лагь хьуну, пландалийн ларсъсса вай циняр давуртту бакIуйн дуккан дан бюхъантIишиврийн.
Дагъусттаннал кIулшивуртту лядуккавриха зузисса институтрал бур 90 шиннардива ливчусса тарих. ТIивтIуну бур институт ДАССР-данул СНК-лул хIукмулийну 1928 шинал. Зузалтрал кIулшивурттал даража лахъ байсса хъунмур къатта тIисса цIа даххана дурну, 1930 шинал ванин дирзун дур Педагогтурал кадрардал квалификация лахъ давриха зузисса институт тIисса цIа. Хъиривми шиннардийгу цимилагу даххана дурну дур институтрал цIа, зий тIурча, мудангу бивкIун бур республикалул учительтуращал цIакьсса дахIаву дуну, миннал кIулшивуртту магьир дуллай.
2015 шинал июньдалул 2-нний цIакь бувсса ДР-лул ХIукуматрал ХIукмулийн бувну, институтрал цIусса тарихрал чIапIи тIиртIуну дур – ванин дирзун дур «Дагестанский институт развития образования» ГБОУ ДПО тIисса цIа.
– Вил пикрилий, дистанциялул дарсру хъиннивкьай ягу къахъиннив?
– Дистанциялий дарсру дишаву – утти му хъанай дур агьалинал оьрмулуву ца агьамсса кIану бувгьусса информациялул ца лишан. ЯлунбучIантIимуниву цимурца дархIуну дур цифралул технологиярттацIун. Цакуну дистанциялул низамрайн бучIан багьаврил тIурча, ккаккан бунни му аралул кIюла кIанттурдугу, хIуркку тIими шачIанттугу. Масалдаран, жул институтрал цаппара пишакартал лявкъунни информациялул технологияртту цалла давриву ишла дан ттигу къахIадурсса, чIявусса учительтал мува куццуй лявкъунни дистанциялий дарсру дишин къасисласисса, аьлтту хьунни мукунма чIявуми дуклаки оьрчIал шаппа компьютерду, смартфонну ва ноутбукру бакъашиву, шяраваллил кIанттурдай интернетрал масъала къулайну бакъашиву ва цаймигу ишру. Вай цимурца кIулшивурттал даража лагь буллалисса дахчиннарду хъанай дур. Мунияту жу, Дагъусттаннал КIулшивуртту дулаврил министерствалул тавакъюрайну, учительтуран кумагран, видеолийн ларсун, 100 дарс дишарду жула сайтрай. Зий буру цайми кумаграл каширдал ялувгу.
ЦIумур дуккаврил шинал щурущи дантIий буру школарттай ттизаманнул шартIру ишла дуллан лахьхьин буллантIисса программарттугу. Мукунма гьашину бикIантIиссар ГИА-лул лагьсса хIасиллу ккаккан дурсса дуклаки оьрчIахь дарс дирхьусса учительтурансса курсругу.
– Щаллу бан дакIний бивкIсса ци масъалартту дузал бан къабювхъуну ливчIри?
– Къабювхъунни жуща ларгмур шинал школарттай жура ххал диргьусса программартту цукун ишла дуллай бурив ххал бан ва кIантту-кIанттурдай семинарду ва мастер-классру буван. Мукунма къабювхъунни, 2019 шинах бурувгун, чансса комплектру бусса школарттан методикалул кумаг буван. Къавхьунни Аьрасатнал цайми регионнайсса кIулшивурттал лябукку ххуй байсса институтирттащал учительтурансса очнайсса курсру сакин бан. ХIасил, цила багьайкун дан къабювхъусса давуртту чIярусса хьунни.
– Ларгмур дуккаврил шинал республикалул педагогтурал ххари бувсса ишругу хьурив?
– Республикалул школарттай, шагьрурдай ягу щархъаву, личIишиву дакъа, за кIулсса, итххявхсса учительтал чансса бакъар. Жулмур мурадгу хъанахъиссар мукунми учительтурал пишакаршиврул опыт ишла баву жула институтрал давривугу.
Барчаллагь учин ччай бур МахIачкъалаллал 1-мур, 10-мур, 16-мур, 17-мур, 18-мур, 50-мур ва 59-мур школарттал каялувчитурахь, ДР-лул РЦО-лул директорнахь, Хасавюртуллал, Къизилюртуллал, Гумбетуллал, Сергокъалаллал, Къаякантуллал, Аьхьхьихъиял, Шамиллул, Табасараннал, Ххунзахъиял, Агъуллал, ЦIумадиял ва Буйнакск шагьрулул кIулшивуртту дулаврил управлениярттал хъуниминнахь жул институтращал архIал зузаврихлу.
– Махъсса шиннардий жулла республикалий чялишну щурущи дурну дур «Земский учитель» тIимур программа. Щархъавун гьаннин миннал зучIа, хIадуршинна тIий, курсругу буккайссарив?
– Му программа щурущи давриву хъуннасса гьурттушинна дуллай буссар жул идарагу. КIира шинал дянив программалийн бувну, щархъавун 190 учитель лавгссар зун. Му программалуву гьуртту хьун рязи хьусса циняв педагогтурал институтрал сакин бувсса хасъсса курсругу бувккуссар.
– Ци чIа учинна ЦIусса шинал учительтуран?
– ХьхьичIра-хьхьичI, чIа учинна цIуллушиву, тIайлабацIу ва давриха зунсса хъунмасса гъира, шавкь. Барча ялун дуркIсса ЦIусса шин!
Ихтилат бувссар
Залму АьбдурахIмановал
