Дагъусттаннал Минздраврал пресс-службалул бувсмунийн бувну, Республикалул Онкологиялул центрданийн бувкIун бур лучевая терапия дуллансса аппаратру.
Вай аппаратирттал кумаграйну операцияртту къабувнува хъин бувайссар дурухлурду дусса къашайшалт. Ва уттизаманнул ххуйсса оборудование ласунсса 653 миллион ккаккан бувну бур «Здравоохранение» тIисса национал проектрал лагрулий.
Минздравраща, ми аппаратру кьюкьин бувансса чаран лявкъуну, 275 миллиондалун цамур техникагу машан ласун хьуну дур. Операцияртту бувай столлу, эксперт классрал узи-аппаратру, эндоскопру ва цаймигу журалул медициналул техника Онкоцентрданийн дуркIун дусса дур. ЦIанакул ми аппаратру бишинсса кIантту хIадур буллай бусса бур, цIусса корпус буллай. Вай аппаратирттайсса хъин бувавугу украсса дикIантIий дур, ОМС-рал лагрулийсса.
