Дагъусттаннал паччахIлугърал университетрал аналитикалул ва фармацевтикалул кафедралул хъунама преподаватель, химиялул элмурдал кандидат Кьурбан МахIаммадов зий ур инсаннал оьттуву антибиотикру бусса ягу бакъасса чIалачIи буллантIисса сенсор сакин баврил хъиривлаявурттаха. Билаятрал элмулул даража лахъ бавриха ва элмулул аралуву дуллалисса ккаккиярттахлу чIявусса цаймигу жагьилсса аьлимтал, аспирантътал кунма, вагу Аьрасатнал Президентнал стипендия ласлан лайкь хьуминнавух уссар.
Жагьилсса аьлимчунал бусаврийну, антибиотикру хIачIан аьркинну бусса бур къашайшалал так аьвкъу-гъили хьуну, азар ялтту дурксса чIумал. Дарув букансса багьана-савав дакъанна, ми хIачIларча, инсаннал цIуллу-сагъшиврун зарал хьурча бакъа, личIисса кумаг къашайсса бур. Миннуйн аьдат хьурча, къашавай хьуни ми хIачIаврия пайда бакъасса бур. ЧIявусса антибиотикру бусса бур жула лагма-ялтту ва дуки-хIачIиялувугу ишлану.
Кьурбан МахIаммадовлул хъиривлаявуртту гихуннай ишла дан бюхъантIиссар медициналувугу, экологиялуцIун дархIусса давурттавугу. Сенсорданул каширду ялу-ялун гьарта-гьарза хъанантIиссар, цанчирча ми ишла бан бюхъантIий буну тIий оптикалул ва вольтамперометриялул сенсорду ххал бигьавриха зузийнигу.
Ионоселективрал сенсордануха Кьурбан МахIаммадов зий усса ур 2020 шиная шинай. Ванал диссертация хас дурну дур сенсор ххал бигьавриву кIусса металлу ишла даврин.
Жагьилсса аьлимучунал ппу Эдуард ур Ваччатусса, нину — Хъусращатусса. ЦIана Кьурбан ур Къазаннай нанисса элмийсса конференциялий.
Жувагу жула чулуха чIа учинну ванан тIайлабацIу ва элмулул ххуллийх дакI дарцIуну ачинсса каши-кьудрат.
