Карашрал шяраваллил тарихрацIунсса цаппара чичрурду

---

Хъунмасса Буттал кIанттул цIанийсса дяъвилий Карашату гьуртту хьуссар 80 чув, махъунай зана къавхьуссар 50, миннал жанну дуллуссар жула тархъаншиврул цIаний.
КIицI лавгми бакъассагу, ялагу хIаписартал хьуссар: Къалла ХIусайн, Султан-ХIусайн (Абакаров), ХIуллихъал Кьурбан (МахIаммадов). Султан-ХIусайн дяъвилия махъгу зий ивкIссар военкоматирттай, полковникнал чиндалийн лавхъун ивкIссар.

---

Дяъвилул шиннардий К. Маркслул цIанийсса Карашрал колхозрал хъинну хьхьичIунсса ккаккияртту хьун дурну диркI­ссар. Маэшатрал хъунмур кIанугу бугьлай бивкIссар яттил. Му чIумал удаманнугу ивкIссар Къаллахъал Оьмарибутта. Мунан дуллуссар орден «Знак Почета». Му хъинну яттил хIал кIулсса пишакар хIисаврай машгьурну ивкIссар Лаккуйгу, Ла­ккуяллил кьатIувгу. Яттил ккалгу му чIумал диркIун дур 12000-ннийн дирсса.

Тай захIматсса дяъвилул шиннардий Карашрал жяматран цайми щархъал жяматирттан кунмасса личIисса ккашигу къа­ккавкссар тIун бикIай, ххишаласса аваданшиву къадиркIнугу. Бабаюртуллал райондалий­сса Бурнааул тIисса кIанайсса къутандалий шагьнал лачIа бугьлай, миннул бакIлахъиялул бакIбуккан буллай бивкIун бур агьали. Му ишираву хъунмасса хIарачатгу бувну бур НухIхъал Сяъдул,Мусилахъал МахIаммадлул, Къаллахъал Ибрагьимлул. Ххишала дакъа агьамсса сакиншиндарал даву дуллай ивкIссар колхозрал председатель Абакархъал МахIаммад (Абакаруп).

Хъинну чIярусса захIмат­шивуртту дурхIуссар хъаннил, душварал, мюрщи жагьилтурал, къужрал, дяъвилийн къабувцусса арамтурал. Муданна­сса колхозрал давуртту дакъа­ссагу, занай бивкIссар къанаврттайн, батагъарттайн. Диялсса бакIлахъия, арцу-мусил матахI, дувсси ва цаймигу чIярусса затру тIайла дуклай бивкIссар фронтрацIунсса кабакьулун.
Севастополь шагьру тархъан бувну махъ та ччаннай бацIан бансса ка-кумаг банну тIисса оьвчаву дурссар Карашрал жяматрал, колхозрал каялувчи Абакаровлул сипталийну. Мунал цалла 30000 къуруш арцул дуллуссар, къачансса арцурду Карашрал щала агьалиналгу дартIун диркIун дур. Севастополлал ца кучалун дирзун дуссар МахIаммад Абакаровлул цIагу.
Му кумаграхлу хъунма­сса барчаллагь баян буллалисса чагъар бувкIссар И.В. Сталиннуяту.

ЧIярусса оьшивуртту ли­ккан дурсса дяъви къуртал хьуну махъгу мукунма жард къаувкуну, колхозрал маэшат гьаз буллай, зун бивкIссар щала жямат. Му чIумалгу цаппара арамтал къалайчишиврий лаглай бивкIун бур Къазаннайн, Ивановалийн, Ссибирнавун, Дянив Азиянавун. Амма чIун-чIумуй шаппайгу зана шайсса бивкIун бур. ХхюцIалку шиннардий тIурча, цала кулпатругу буцлан бивкIун бур цащала. 1952-ку шиналнин МахIачкъалалив миналул хьу­сса увагу ца караширичу ивкIун ур – МахIаммад Башаев.
1944-ку шинал колхозрал ларсун диркIун дур Анжилий къатри-хIаят, къутандалийн ва къутандалия наними бацIавансса, колхозрал кьай-кьуй дишавансса. Микку завхознугу ивтун ивкIссар аьрая ца ччан бакъа зана хьусса Къалла МахIаммад. Къатри дан­сса кIанттугу лавсун, хьхьичIра-хьхьичI МахIачкъалалив къатри дурссагу муналли. Шагьрулий къатригу ларсун, мунал хъирив бивзмину хьуссар ХIапизахъал Расул, Шамсу, ванал уссу МахIаммад. Ялу-ялун гьарза хъанан бивкIссар бизлазими.

Мукун бунугу, ми шиннардий шяраву биялсса халкь бивкIссар. Яла тIурча, Хрущевлул заманнай, ичIува вари чинсса ризкьи ябан къабитлай, зехлай, ччи-ччимуний налогру дихьлай бувккукун, инсантурал пикрирду шагьрулул чулийнмай буруглаги хьуссар. Ми шиннардий колхозрал председательну ивкIссар жува хьхьичIгу кIицI увсса фронтовик-хIаписар, хасиятралгу мадара аьнт-аьнтсса адамина, муниннин школалул директорнугу ивкIсса инсан – Баттал МахIаммадов. ЧIалай ур мугу та чIумун лавхьхьуну бурма чIуен буллалисса каялувчину ивкIшиву.
Карашралссагу, къакарашралссагу, циняв Лаккуйссагу халкь шагьрурдайн бачаврил хъунмур сававну хьуссар республикалул бакI дургьуминнал политика – агьали зунттаву бацIансса шартIру дурагу дузал дуллай къабивкIшиву, «неперспективнайсса» тIисса бала-хатIасса махъгу ляхъан бувну, кIий яхъанахъиминнал буллалисса захIматрал бачIиннухссавагу хIакь къабулайсса бивкIшиву, сайки лагътурал тагьарданий тIиссакссагу, халкь колхозирттаву зузи бувну бикIаву.

1957-ку шинал Зухралу тIисса лухччиний хьун бувну бивкIссар 8 гектарданийсса ахъулссаннул ххаллилсса багъ. ЧIярусса шиннардий мунил багъманчишиву дуллай ивкIссар Оьмари АхIмадов. ХIатта Социалист захIматрал Виричунал цIа дулунгума ккаккан увну ивкIун ур му.
Къутандалий бувну бивкI­мур багърал багъманчи ХIа­жимахIаммад Оьмаровлун дуллуссар ЗахIматрал ЯтIул Ттугълил орден. Ца яла ла­хъимур чIумул мутталий (28 шин) К. Маркслул цIанийсса колхозрал председательшиву дурссар ­Аьлил Аьлиевлул.
Карашрал хъанниву хьхьичIра-хьхьичI дянив­сса даражалул кIулшиву ларсун диркIун дур Сажжихъал Па­тIиматлул (МахIаммадова Па­тIимат Ибрагьимлул душ, яла Абакарова), хъиривра ванил ларсун дур диял дакъасса лараймур кIулшивугу – бувккуну бур учительтал шайсса Хъаннил институт (1948 ш.). Лавайсса даражалул кIулшиву 1957 шинал ларсун дур Къаллахъал ХIулайматлул.

Хьуну ур элмурдал арула кандидат: Саэд Къаллаев (математик, профессор), ВахIид Дамаев (юрист), Башир Абакаров (агроном), ПатIимат ХIусайнова (биолог), ХIажи ХIажиев (биолог), ПатIимат Шабанова (филолог). Уссар ца докторгу – ХIурия Юсупова (филолог).
Карашрал буссар ацIва оьрчI бувсса, «Нину-Виричу» тIисса цIанин лайкь хьусса, кIива хъамитайпа – Аймисай МахIаммадова (Батталлул кулпат) ва ПатIимат ХIасанова, (Касала-Мусал кулпат).
Ккалли бансса къуллугъирттай, давурттай, хьхьичIва кIицI бувми бакъассагу, ялагу зий бивкIссар ва зий буссар: Кьурбан-МахIаммад Дамаев – СССР-нул Верховный Советрал депутат; Ислангарай Юсупов – КГБ-лул полковник; Жамалу­ттин Аьбдулхаликьов – Лакрал райисполкомрал председатель; Зоя МахIаммадова (Кьасиннул душ) – ДР-лул цIуллу-сагъшиву дуруччаврил министрнал заместитель; Загьиди Юсупов – Лакрал райондалул прокурор; Аьли­баг Аьлиев – Лакрал райондалул прокурор; Минкаил Оьмаров – Республикалул прокуратуралул зузала; Амир ­Аьлиев – Хьурттал совхозрал директор; Жалалуттин Шуаьев – МахIачкъалаллал ЦУМ-рал директор; Аьишат МахIаммадова – кафе-рестораннал директор, Манап Шабанов – Лакрал райпорал председатель; Сакинат Шуаьева – ДР-лул захIматрал ва социал иширттал министр­нал заместитель; МахIаммад Аьлиев – КIулушацIрал колхозрал председатель; Микьдад Шабанов – Федерал казначействалул начальникнал заместитель; Гулайла Оьмаханова – МахIачкъалаллал Модалул къатлул хъунмур специалист; Руслан Башаев – «Илчи» кказитрал хъунама редактор.

Москавуллал консерватория бувккуссар Зайналаьбид Къаллаевлул.
Дагъусттаннал спортрал дунияллий диялну машгьурну дуссар Карашрал жяматрал дянива бувксса спортсментурал цIарду: Жаруллагь Мурадов (биту), Баттал ХIажиев (лачIунукку), Ярагъи Шуаьев (лачIунукку), Ибрагьим Ибрагьимов (лачIунукку), Аьбдулкарин Айгунов (каратист).