Коронавирусрал тагьар ххал диргьунни

Ноябрьданул 3-нний Дагъусттаннал БакIчи Сергей Меликовлул каялувшиврий хьунни коронавирусрал инфекция ппив шаврил хьхьичIалу кьукьаврил Оператив штабрал батIаву.


Республикалул БакIчинал тIимунийну, цIанасса ппурттуву коронавирусрацIунсса тагьар Дагъусттаннай цалий дарцIуну дунугу, паракьат хъанан ттигу ччяссар, мира давуртту дуллан аьркинссар тихуннайгу.

Сергей Меликовлул исват бунни, хIакьину федерал центрданул даражалий Дагъусттан таман­сса цалий бавцIуну чIалай бушиву. МуницIунма, увкунни мунал, агана мува куццуй ттинияр тихунмайгу коронавирусрал хьхьичIалу кьукьинсса давуртту дулларча, цIуцIаврил ккаккияртту яларай дагьантIий дур куну.
ДР-лул БакIчинал бувсунни хъуннасса къулагъас дуван аьркинну душиву 65 шинавун бив­сса инсантурах, миннан ккаккан дурну дур самоизоляциялул низам, цалсса ноябрьданул 3-нния 16-ннийнин.

Ихтилат хьунни мукунма, кьатIув халкь гьарзасса кIан­­ттурдай чара бакъа мас­кар­ду лаххан аьркиншиврул хIа­къи­равугу, багьана-савав дакъана школартту манзилданул низамрайн бучIан къабуван аьркиншиврул хIакъиравугу.

Коронавирусрал инфекциялул хьхьичIалу кьукьаврил давурттал хIакъираву махъ лавхъунни ДР-лул Роспотребнадзорданул управлениялул каялувчи Николай Павловлул. Мунал тIимунийну,республикалий сияхIрайн лавсун ур ур ковидрал къашавай хьусса 16 азаллий 306 инсан. Ца хьхьу-кьини къашавай шайми чан хьуну бур хьхьичIмур зуруйминнах бурувгун.
ДР-лул цIуллушиву дуру­ччаврил министр Жамалуттин ХIажиибрагьимовлул бувсмунийну, цIанасса ппурттуву дузал бувну бур азарханардай 3100 инсаннансса кIанттурду, азарханардай хъин хъанай ур 2276 къашайшала, амбулаториялул тагьарданий – 518 инсан.

Министрнал бувсунни мукунма агьалинайн вакциналул ххалаххив баврил хIакъиравугу.
БатIаврий ихтилат бунни Дагъусттаннал жагьилтурал иширттал министр Камил Сяидовлулгу.
Цаппара муниципалитетир­ттал каялувчитурал бувсунни кIантту-кIанттурдайсса тагьардал хIакъираву.
Дагъусттаннал БакIчинал дунни масъала ххал бигьаврил хIасиллу ва цаппара къуллугъчитурайн дунни тапшурлугъру.