ХIалал дурсса бахшишру

Халкьуннал цашиврул байрандалул хьунин ДР-лул ХIукуматрал Председательнал цалчинма хъиривчу Анатолий Карибовлул ва ДР-лул культуралул министр Зарема Буттаевал дуллунни паччахIлугърал ва Культуралул министерствалул чулухасса наг­радартту.


Цалва ихтилатраву Анатолий Карибовлул кIицI лавгунни махъсса ппурттуву сайки цинярдагу шадлугъру хъанахъишиву онлайн-режимрай, барчаллагь увкунни культуралул зузалтрахь цIанасса бигьа дакъасса чIумал буллалисса захIматрахлу.

Зарема Буттаевал цилвамур ихтилатраву чIурчIав дунни культуралуву мудангу щуркIал хъанай душиврий республикалул каялувшиндарал чулухасса бургаву, кабакьу.
Ва кьини паччахIлугърал наградартту ва бусравсса цIарду дуллуминнал сияхIрай къачан­сса дия лакраву, дагъусттанлувтураву ххуйну кIулсса цIардугу: Хан Баширов, Рамазан Фаталиев, Шамсуттин Къапланов, Аминат ЯхIияева, Шагьалай МахIаммадова ва цаймигу.

Бадрижамал Аьлиева