Лак лагма лаган бувну бия Идавсихсса ччаврил

Ларгсса ххуллункьини МахIачкъалаллал зума-къирагърайсса Ися Идавсил (с.аь.) цIанийсса РувхIанийсса центрданийн бавтIун бия чIявусса лакгу, хъамалгу МухIаммад Идавс () увсса зурул мажлисрайн. Най бунува кIицI лаганна, магъи дакъасса майданнив бухьувкун мажлис (центр буллайнма бур, магъайн биян бувар), тIабиаьтралгу, Аллагьу Тааьланалгу лакрацIун кабавкьусса кьини дия. Дяркъу духьурчагу, дакъая хъирив кьини куннасса зиг буллуну ларчIсса гъарал.


Мажлис бачин бувну ия машгьурсса артист, ННТ телеканалданул директор Султан Трамов. Мубараксса Кьурандалул аятирттайну мажлисрал дайдихьу дурна МахIачкъалалив уттигъанну хьусса азан учаврил конкурсрай ххув хьусса ххутириоьрчIал, МухIаммад-Наби Буттаевлул. Хъирив жямат барча буллали­сса ихтилат бувна Супиян Оьма­ровлул. Дагъусттаннал муфтиятрал ва хасну муфти АхIмад- ХIажи Аьбдуллаевлул цIанияту лакрал миллат барча буллали­сса ихтилат бувна муфтинал хъиривчу МахIаммад Майрановлул. Ванал цалва ихтилатраву кIицI лавгуна жула мадрасарттаву ва исламрал вузирдаву лакрал оьрчIру- душру чIявусса бушиву.

«Дагъусттаннай хьхьичIра-хьхьичI ислам дин кьамул дур­сса миллатрал наслу зува бушиву мудангу дакIний битан аьркинссар, хIарачатрачIанни барачатгу бучIайсса», – увкунни ванал. Ванал мукунма бувсуна хъирив кьини Гъумук цIусса мадраса тIитIлай бушивугу, му мадраса зузи баврил барачат щалвагу билаятрайн биянссар тIисса умуд бушивугу.

Ванал хъирив ихтилатру бувна: Лакрал ва Ккуллал районнал имамтурал каялувчи Шамил БахIандаьлиевлул, ЦIуссалакрал райондалул Имамтурал советрал председатель Мансур Хаваевлул, МахIачкъалаллал Сайпуллагь-Кьади Башларовлул цIанийсса мизитрал имам МухIаммадрасул МахIадовлул, Лакрал жагьилтурал ккурандалул бакIчи Давуд Амировлул.
Шиккува кIицI лаганна чIявуми ихтилатру лакку мазрайсса бивкIшивугу, диндалул дунияллий махъ нанисса инсантурал пасихIсса лакку мазрай­сса ихтилатрах вичIи дишинсса тIайлабацIугу бивкIшиву.

Жагьилтурал тарбиялул гьанурду цIакьну бикIаншиврул, ми тIайласса диндалул ххуллу-ххуттайн бутангу нитти- бу­ттахъалгу бияла бушиврия, исламрал кIулшивуртту куртIгу, цIакьгу дуллан ччисса жагьилтуран вузирдавун мудангу ххуллу тIивтIуну бушиврияту бия философиялул элмурдал доктор Асият Буттаевал ихтилат.
Мариян Илиясовал цIа­нийсса «Дараччи» фондрал хъунмур Гульшан Хасаевал увкуна: «ЧIалай бурив хIакьину ва мизитрал чIиртту бувну къуртал къабувну, магъи дакъа. Вана укунсса асар бикIайссар дин дакъасса инсаннал дакIнивугу – цирив диял дакъашиврул, рязи бакъашиврул асар. Диндалул нур дакIнивун дияйхту, инсан рахIат уккайссар. Аллагьнал мизит – щаллагу дуниялли, исламгу — хъиншиврул, хъинбалдарал, рахIму- цIимилул динни».

Вава «Дараччилул» Москавливмур филиалданул хъунмур Мариян Кьаландаровалгу бувсуна Москавливсса лакгу гьарцагу лакрал мероприятиярттай гьуртту хьун хIарачат буллай бушиву.
Вихьуллал шяраватусса Ися Аьбдуллаевлул бувккуна мажлисран хасну цIуну ляхъан був­сса шеъри. Лях-карах программа ярг дуллай бия динийсса балайрду учайсса машгьурсса артистал.
Мажлис ярг-чIюлу бувна ми­ккун бувкIсса гьарцагу хъамитайпалун хъункIултIутIив пишкаш дуваврил. Мажлисралсса буллалиминнал зумату бавуна, 700 хъункIултIутIи диял къархьуну, ялагу жагьилтал машан ласун тIайла бувксса хаваргу. Хъамалу бувна бавтIцирив нахIусса пулавлий, нацIу-кьацIулий.

Мажлисрал байлитIулий тIурча, чIивимур хIажлийнсса- оьмралийнсса путёвкалул заллуну хьуна билетрал цифра тIайлабавцIусса ца чувгу. Азаруннияр ххишаласса агьлу бавтIсса мажлисрая рязи акъа­сса бакIрайн къаагьунни. Лак лагма лаган бувну бия МухIаммад Идавсихсса (с.аь.с) ччаврил. Ва мавлуд барачат хьуну, дацIаннав тIий бур лакрахагу, бусурман умматиннахагу дурцирив дуаьрду.

ЛичIиссава барчаллагь баян бува тIий, тавакъю буллай бия ва халкьуннал байранну хьу­сса рувхIанийсса ххуйшиву лакрал миллатран пишкаш дувансса хIарачат бувсса Дагъус­ттаннал муфтиятрайнгу, цивппа хьхьичIунмай хьуну, даву лайкьсса даражалий дуван бюхъу- хъитлий бивкIсса чиваркIуннайн ва душваврайнгу.
Навагу бакьлай бура бар­чаллагьрайминнацIун.
Суратру авторнал