Хъунмасса ссалам ттул ххирасса Дагъусттаннайн! Ссалам хIурмат бусса «Илчи» кказитрал редакциялийн Къабардин- Балкьарнава.
Жу, Нальчик шагьрулий ялапар хъанахъисса лакрал кулпат, Оьмаровхъул, жула ххирасса кказитрайхчин дакIнийхтунусса барчаллагь учин ччай буру Буйнакскалийсса «Милосердие» тIисса интернатрал директор Битаров МахIаммад ГъазимахIаммадовичлухь.
Ноябрь зурул 10-нний жу бувкIссияв Буйнакскалийн интернатрайсса жула гъанчунах буруган. БувкIсса чIумал, дарвазалий «Карантин» тIий чивчуну ккавккун, хъинну пашман хьуру. Ахттайн чаклил чIун дия. Чак бувну махъ, зузалтрал дарвазалийсса чIивисса чIавахьулу тIивтIуну, жухь бувсуна пандемиялуцIун бавхIуну интернатрай карантин душиву, къашайшалтрачIан буххан къабитлатишиву.
Жу архния бувкIшиву, гъанчу къаккавккун гьан ччай бакъашиву бувсукун, интернатрал каялувчинан жул тагьар дурчIуну, маскарду ва катIригу лаххан бувну, буххан бивтунну. ХIаятравун бувхсса чIумал, жу яла ххуймур санаториялул хIаятравун бувхссаксса хьуру – гьарта- гьарзашиву, марцIшиву, паракьатшиву. Директорнал ва зузалтрал кьамул бунну жу хIурматрай. Директор МахIаммад ГъазимахIаммадович ия дакI хъинсса, аьчухсса инсан.
Мунал ккаккан бувна жун интернатрал къатри, къашавайминнансса шартIру. 400-нния ливчусса къашайшалт бия интернатрай. «Цукунсса бунугу кумаг аьркиннив?» – цIувххукун, гьарзат дур, цичIав къааьркинни увкуна. Мяйжаннугу кIикку гьарзат дия. Къашавайминнангу, зузалтрангу циняв шартIру дузал дурну дия: дукра дукай кIантту, хIаммам, уттубишайсса, телевизор ххал байсса къатри – гьарца кIанай марцIшиву, лазилакьаву, низам.
МахIаммад ГъазимахIаммадович, Заннал цIуллушиву дулуннав вихьхьун, вил гъан-маччаминнахьхьун ва зузалтрахьхьун! Ина чIявуссаннал эбрат ласунсса каялувчи ура, я Аллагь, вил каши- кьудрат ххи даннав!
ХIурматращал Оьмаровхъал кулпат,
ш. Нальчик
