Ва нюжмардий МахIачкъалалив Этникалул культуралул центрданий «Хъуннасса этнографиялул диктант» тIисса акциялун хасъсса батIаву хьунни. Ва хъанахъиссар щалва билаятрал циняв регионнай

З. АьбдурахIманова
Халкьуннал дянивсса акциялул лагрулий чирчусса диктант. Диктант чичин бувкIминная тIалавну бия 30 суалданухьхьун­сса жавабру дулун, миннува 20 суалгу Аьра­сатнаву ялапар хъанахъисса циняв миллатир­ттайн багьайсса ва 10 суал жулла республикалийсса миллатирттал культуралия, тарихрая, аьдат-эбадатирттаясса бия. Жулла миллатирттал культуралуцIун, та­рихрацIун, оьрмулул багьу-бизулуцIун бавхIусса суаллу сакин бувну бия диктантрал сакиншинна дурсса ДР-лул Миллатир­ттал иширттал министерствалул.
Гьашинусса эпидемиологиялул тагьаргу хIисавравун ларсун, диктант чирчуссар онлайн-режимрай. Акция тIитIлатIисса батIаврий гьуртту хьун ва кьини шиккун бувкIун бия ДР-лул миллатирттал иширттал министр Энрик Муслимов, ДР-лул Муфтиятрал хъунама Шамил Аьлиханов, Оьрус­нал килисалул вакил, иероманах Иоанн (Анисимов) ва цаймигу вакилтал.
Энрик Муслимовлул диктант чичлай байбишин хьхьичI кIицI бувна укунсса мяъна-мурадрал акцияртту чIявумиллатру яхъана­хъисса Аьрасатнаву дикIу, жулла республикалий дикIу, чIун-чIумуй дуллан аьркиншиву, цанчирча миллатирттал дянивсса дусшиврул ламурду цIакь бавриву вагу хъуннасса даврин ккалли хъанай тIий.
«Гьарца миллатран ца цалламур дакъа, чIаххуврайсса миллатрал культура ва аьдатру кIулшиврия, хавар бушиврия ци заралли хьунтIисса. Гьарца инсаннан цайми миллатирттал тарихраягу, багьу-бизулиягу, мазрал кьараллаягу кIулну хъиннихха. Хаснува чIявумиллатру яхъанахъисса жулла хIукуматрайгу, республикалийгу цанная ца къакIулшиву, цаннал ца культуралиягу, тарих-таварихраягу хавар бакъашиву кьюкьаласса ишну чIалан аьркинссар», – увкунни министр­нал.
Шиккува дакIнийн бутан, жулла республикалий ларгмур шинал дурсса акциялул лагрулийсса диктант чирчуссар азараксса инсаннал. Диктантрал майданну тIивтIуну бивкIссар шагьрурдай ва щархъаву. Гьашину тIурча, акция дурссар тагьарданух бурувгун, дистанциягу дурурччуну. Диктант чичин гъира буминнаща бюхъантIиссар, ноябрьданул 7-ннин ДР-лул Миннацрал сайтрайн бувххун, онлайн-режимрай чичингу.