Ноябрь зурул 14-нний Дагъусттан Республикалул кIулшивуртту дулаврил идарарттай байбивхьунни мушакъатшиву дусса оьрчIал дянивсса пишардал магьиршиву ккаккан дуллалисса региондалул IV-мур «Абилимпикс» тIисса чемпионат. Шиккува кIицI лаган, «Абилимпикс» чемпионат хъанахъиссар «Россия – страна возможностей» тIисса Аьрасатнал Президент Владимир Путиннул проектирдавасса ца сиптану.
Имара Саидова
Ва проектрайн бувну, Аьрасатнаву ялапар хъанахъисса цIуллу-сагъшиврул ссуссукьушиву дусса инсантураща бюхълай бур 21 журасса пишардал усттаршиву ккаккан давриву гьуртту хьун ва ми пишардай зун. Аьрасатнаву укунсса бяст-ччаллу буллалаву хъуннасса агьамшиву дусса даврин ккалли дурну дуссар. Чемпионатрал программалуву, пишардал магьиршиву ккаккан даву дакъассагу, хьунтIиссар хъунисса предприятиярттал каялувчитуращалсса хьунабакьавуртту, мастер-классру. Мукунма вайннахь буккинтIиссар пишарду язи бугьаврин ва ми куртIну лахьхьаврин хас бувсса лекцияртту, бусантIиссар профессионалтурал чулухасса насихIатру.
Гьашину кIилчинсса шинни Дагъусттаннал паччахIлугърал педагогикалул университетраву «Дошкольное воспитание» тIисса компетенциялувун багьайсса пишардал бяст-ччаллан хас бувсса чемпионат буллай. Шиву гьуртту хъанай бур ДГПУ-рал «Школалийн бачиннинсса кIулшивуртту дулайсса» факультетраву дуклакисса студентътал. Гьашинусса чемпионатрал финалданувун бувххунни ва факультетрал студентка Полкаева Марина.
«Куклу машинартту бакьин баву» тIимур компетенциялувун багьайсса пишардал усттаршиву ккаккан дуллалисса бяст-ччаллу хьунни Дагъусттаннал Автомобильно-дорожный колледжраву. Машинартту бакьин баврил пишалул усттаршиву ккаккан давриву ххув хьусса Мухтар Зайнулаьбидов гьуртту хьунтIиссар миллатирттал «Абилимпикс» тIисса чемпионатрал финалдануву.
Аскерхановлул цIанийсса медициналул колледжрал хъунмур эксперт Наида Садруттиновал каялувшиннаралу хьунни «Медициналул ва социал бургаву» тIимур компетенциялувун багьайсса пишардал усттаршиву ккаккан дуллалисса бяст-ччаллу.
Шикку гьуртту хьунни Аскерхановлул цIанийсса Дагъусттаннал медициналул колледжрал, ДГМУ-равусса Аьрасатнал Минздраврал колледжрал, Аьлиевлул цIанийсса Каспийскаллал медициналул училищалул, Башларовлул цIанийсса Буйнакскаллал медициналул училищалул ва Медицинский колледжрал студентътал. Вай бяст-ччаллаву цалчинсса кIану бувгьунни Аскерхановлул цIанийсса ДБМК-рал студентка ХIусманова ПатIиматлул, кIилчинсса кIану бувгьунни Буйнакскаллал медучилищалул студент Мажид Аьбдуллаковлул ва шамилчинсса кIану ДГМУ-рал медколледжрал студентка Аьбдусалимова Париханумлул.
Аьшураьлиевлул цIанийсса Технический колледжраву, кувннил хъирив кув, кIира кьини хьунни «Администрирование баз данных», «Веб-разработка», «Сетевое и системное администрирование» тIисса ва компетенциярдавун багьайсса пишардал магьиршиву ккаккан дуллалисса бяст-ччаллу.
