Кулпатирттал чIарав бацIаву мурадрай

Аьрасатнал Федерациялул ПаччахIлугърал прессалул къуллугърал баян бунни Аьрасатнал премьер-министр Михаил Мишустиннул хIукму бувшиву Дагъусттан Республикалийсса шанна шинава арулла шинавун бияннинсса оьрчIру бусса кулпатирттан ка-кумаг баву мурадрайсса 7 миллиард арцул итабакьинсса.


Премьер-министрнал, вайва иширттан цIа куну, Аьрасатнал цинярда регионнангу 61,8 миллиард арцул итабакьинсса хIукму бувну бур.
«Сайки 62 миллиард арцул ххишалану итабавкьуссар регионнайсса шанна шинава арулла шинавун бияннинсса оьрчIан гьарца зуруй дулаймунин», – тIий, бувчIин буллай ур премьер-министр.
Аьмну щалва билаятрай вайннул лагру дикIан най дур 5,500 къуруш.

ДакIнийн бутан, ванияр хьхьичIвагу Михаил Мишустиннул баян бувссия, укунсса кулпатирттан Федерал бюджетрава 123 миллиард арцул итабакьин­сса хIукму бувшиву.