Ноябрьданул 11-нний ДР-лул БакIчи Сергей Меликовлул къулбас дунни республикалул хъусну хъанахъисса аьрщарал участокирттал каялувшиврул мюнпат лахъ баврин ва ми тIайлану ишла дуллалаврин хасъсса комиссия сакин баврил хIукмулий.
ВКС-рал низамрай муниципал сакиншиннардал бакIчитуращал хьусса батIаврий Сергей Меликовлул бувсунни Дагъусттаннал инфраструктуралул планну кIантту-кIанттурдал аьрщарацIун дархIуну дикIан аьркиншиврул агьамшиврия. Мунийн бувну региондалул каялувчинал бувсунни, къулбас дуршиву аьрщарал ва хъуслил арарду низамрайн дуцин аьркиншиврул хIакъиравусса хIукмулий. «Му ревизия бакъар, му бур жучIара дусса аьрщив мюнпатну ишла дуллан аьркиншиврул хIакъиравусса хIукму. Аьрщив дакъахьурча, республикалул инфраструктуралия гъалгъа тIун пайда бакъассар», – увкунни республикалул каялувчинал.
Му хIукмулий ДР-лул ХIукуматрайн тапшур бувну бур гьашину ноябрьданул 16-ннийнин сакин буван ДР-лул хъусну хъанахъисса аьрщарал участокирттал каялувшиву даврил мюнпат лахъ баврин ва ми тIайлану ишла дуллалаврин хасъсса комиссия. ЦIакь буван комиссиялул хIакъиравусса хIалкьазия (положение). Комиссиялун аьркинссар ялунчIил февральданул 15-ннийнин щаллу дуван мюнпатну каялувшиву даврил, аьрщарал участкартту тIайлану ишла дуллай бушиврул ххал бигьавуртту буван.
Сергей Меликовлул тIимунийну, тIайлану ва мюнпатну ишла къадуллалисса аьрщив бюхъантIиссар аьркин дуллан социал иширттан, экономика ва шяраваллил хозяйство лядуккан даврил ххуллий.
Комиссиялул давуртту къуртал хьуннин республикалул ХIукуматран ва Аьрщарал ва хъус-хъиншивурттал арардал министерствалун аьркинссар аьрщив дахлахаврил, ижаралий дуллалаврил, дахханаххи дуллалаврил, ширишилий дихьлахьаврил ва цаймигу аьрщарацIун дархIусса давуртту дацIан дуван.
Му хIукмулуцIун бавхIусса масъаларттал хIакъираву оьвчин бюхъайссар горячая линиялул телефондалийн: 8 (8722) 666-999, дяхтта ссят 9-нния 18 -ннийнин.
Мура темалул хIакъиравусса брифинг журналистътуращал дунни ноябрьданул 11-нний ДР-лул аьрщарал ва хъус-хъиншивурттал арардал министр АгъарахIим КьагьирхIажиевлул ва ДР-лул юстициялул министр КъазимахIаммад Сафикьурбановлул.
