Премиялун лайкь хьунни жулва ХIабибатгу

Вай гьантрай Оьруснал театрдануву, Дагъусттаннал Культуралул министерствалул ва Республикалул Халкьуннал творчествалул къатлул сакиншиннарай, хьунни «Душа Дагестана» цIанилусса гала-концерт. Шикку гьуртту хьунни Дагъусттаннал шагьрурдаясса ва районнаясса артистал ва хореографиялул коллективру. Миннувух дия ЦIуссалакрал райондалул Культуралул управлениялул хъунмур, ДР-лул Халкьуннал артистка ХIабибат Буттаевал каялувшиндаралусса «Дараччи» ансамбльгу.


Ца-кIива гьантлул махъ, Р. ХIамзатовлул цIанийсса Миллатрал библиотекалуву хьусса шадлугърал мажлисрай язиминнан наградартту дуллунни. Вай чIявуми бия халкьуннал творчествалул ва культуралул ххуллий хъунмасса захIмат бивхьусса, Дагъусттаннай бакъасса, республикалул кьатIувгу машгьурсса инсантал.
«Халкьуннал балай» номинациялуву награда лайкь дунни ХIабибат Буттаевал.

Шадлугърал мажлис бачин бувну бия Дагъусттаннал цалчинсса вице-премьер Анатолий Карибов, культуралул министр Зарема Буттаева, ванил хъиривчу ва Республикалул Халкьуннал творчествалул къатлул директор Марита МухIадова.

ДакIнийн бутан, 2002 шинал Аьрасатнал хIукуматрал цIакь дурну дуссия культуралул ва искусствалул аралуву зузиминнансса «Душа России» тIисса премия. Хъирив мукуннасса премияртту субъектирдайгу цIакь дурна. Ванийну, цала оьр­му халкьуннал искусствалун хас бувсса культуралул зузалтрахасса аякьа, миннансса кабакьу ххишала хьунни.
– Укунсса премиярттал жула аслисса искусствагу, халкьуннал творчествагу хьхьичIуннай даврил цIаний зунсса гъира-шавкь рутлатиссар, – кIицI лавгунни цилва ихтилатраву Зарема Бу­ттаевал. Лавайсса кьимат бивщунни культуралул ва искусствалул аралуву зузиминнан Анатолий Карибовлулгу.

Андриана Абдуллаева

Андриана Абдуллаева

Читайте также: