«Самородки» проектрал лагрулийсса ирглийсса выставка
Ноябрьданул 24-нний Республикалул Халкьуннал творчествалул къатлул галереялуву хьунни Ибрагьим Сунгъуровлул «Добрых рук творенье» тIисса цIанилусса выставка. Му хьуссар РДНТ-лул «Самородки» тIисса проектрал лагрулий.
Выставка тIиртIунни ДР-лул культуралул министрнал хъиривчу – Дагъусттаннал Халкьуннал творчествалул къатлул директор Марита МухIадовал.
– ХIакьину жучIара дур ляличIисса выставкагу, му выставкалул авторгу. Коронавирусрал инфекциялул пандемиялул даххана дурунни оьрмулухсса жулла бургаву, амма мунил баххана къабувссар творчествалул инсантурахсса жулла бургаву, миннал кьадру-кьимат, – увкуна Марита Велихановнал.
Выставка тIитIлатIисса шадлугърай гьуртту хьунни ДР-лул Художниктурал союзрал председатель Кьурбанаьли МахIаммадов, ДР-лул Художниктурал союзрал Выставкартту дувай залданул директор Амирхан МахIаммадов, Жамаллул цIанийсса Дагъусттаннал художествалул училищалул директор Мухтар Камбулатов, МахIачкъала шагьрулул художествалул школалул директор Гульнара Мамашева, искусствовед, РДНТ-лул пишакар, АьФ-лул Художниктурал союзрал член Мариян Чалабова, художникнал гъан-маччами, МахIачкъала шагьрулул чIава художниктал ва цаймигу хъамал.
Ккуллал райондалийсса Ваччиял шяравасса Сунгъуровхъал кулпатрал Дагъусттаннан пишкаш бувну бур цимивагу гьунар, Ибрагьим Сунгъуровгу ур гьунар бусса уссурвавраву чIана-чIивима. Ванала уссил – ХIажи Сунгъуровлул выставкагу хьуссар вара «Самородки» проектрал лагрулий ванияр шиннардил хьхьичI.
Ибрагьимлул 1975-ку шинал къуртал бувну бур Ростовуллал инженерно-строительный институт, перестройка сукку хьуннин зий ивкIун ур «Дагпромстройрай», 90-ку шиннардия шийнай зий ур прорабну строительный фирмардай. Искусстварив дур ванал хобби – даврия тархъансса чIун гьан дуллансса, дакIнил ларсъсса даву. Амма цавай инсантураща цалла хоббину хъанахъисса касму бигьанна даххана дуван бюхъарча, вананнив, ва дакъасса, цамур касму цалла хоббину чIалай дакъар. Зувинния лирчусса шиннардий Ибрагьим цалагу отпускрайн увккун акъар, цалла даврия дур кусса тархъансса чIун творчествалун харж дуллай. Вайксса шиннардий творчествалуха зий, канила цикссагу хъин-хъинсса давуртту дурксса, цайнува цува хьусса художник зий ур цала шава, 7-мур зивулий, балкондалий.
Миккура, 3 къатта бусса квартиралуву, ядуллай ур цалла карунних дурсса давурттугу. Ибрагьим ур хъинну нажагь дакъа хьунакъадакьайсса ва хъинну хIазсса творчествалул журалухун агьну. Ва ур тIабиаьтраву хьунадакьайсса затирттая скульптурарду дуллай: мурхьирал къяртрая, мархрая. Хасну миннух луглай занайгу ур Ибрагьим тIабиаьтравух, яни тIабиаьт цурда хъанай дур художникнал соавторну. Художникнаву цавурагу тIабиаьтрал материалдануву цалла дуван нанисса давурттал куцру, образру чIалансса, хIисав хъанансса личIлулшиву, чани, аькьлу-кIулши диялну, щаллуну дур, ва гьунаргу, вай хасиятругу нажагьссанначIа дакъа къадикIайссар.
Скульпторнал гьунар Ибрагьимлуйн, щак бакъа, бивхьунссар цала буттая – Гьаруннуя. Вайннал кулпатраву яхьуну дур чарий буттал цIурцIусса Сталиннул сурат, мукунна цайми-цаймигу давуртту. Ми цаппарасса давурттах бурувгунма бувчIлай бур цуксса хъунмасса гьунарданул заллу ивкIссарив Гьарун ва, оьрмулул нязаннив, 32 шинаву, дунияллия къалавгния, муная цуксса бюхттулсса художник уккан най ивкIссарив.
Ибрагьимлул дурсса давурттаву дакъасса дакъар: оьрватIи, макьараоьрватIи, шатта, бюрни, чу, барцI, ццацкIулу, барзу, цуша… Жанаварданул ягу лелуххул къалип ванал цал-цал щаллу бувай ца тIаннул чIутIлуя, цамур парча хIала къабувну. Цал-цалгу – тIаннул личIи-личIисса бутIри цачIун бувну.
ТIабиаьтраяра дарккусса къяртта-тIама, мунил даркку-шарккушиву ванал муксса усттарну ишла дуллай урхха, урувгманан га, инсаннал кару хIала къадурхна, тIабиаьтрал циллара дурсса кунна чIалансса куццуй. Жанавартралми дакъасса, дур ванал мура тIаннуя дурсса цаппарасса инсантуралми суратругу: цала буттал буттал МахIаммадлул ва ниттил буттал ХIусайннул суратру, мукунна шяраваллил гьарайзул МахIаммадлул суратгу.
ТIаннуха зий ур Ибрагьим 1987-ку шиная шийнай, муния шийннай ванал дурну дур 57 скульптуралул композиция. Пейзажирттахун агьну тIурча, художникнал шин шавай дур, му хъун дакъасса чIумул мутталий ванал 12 пейзаж щаллу дурну дур. Миннувух дур Щуну-Зунттул суратгу, буттал шяраваллил – Ваччиял суратгу, Гъумучиял бярнилссагу.
