ОьрчIал маданиятрал школарду яхьуншиврул

Уттигъанну видеоконференциялул журалий хьунни АьФ-лул Культуралул министерствалул совещание. Му дачин дурну бия Аьрасатнал культуралул министрнал хъиривчу Ольга Ярилова. Дагъусттан Республикалул чулуха совещаниялий гьуртту хьунни культуралул министр Зарема Буттаева.


Совещание хъунмурчIин хас дурну дия билаятрай «Культура» тIисса национал проект щаллу даврил масъаларттан.

Яриловал дакIнийн бувтунни Культуралул советрал батIаврий билаятрал Президентнал, маданиятрал кIулшивуртту ласаврихсса къулагъас ларай дуллай, увкусса махъру:
«На уттинингу увкусса куццуй, оьрчIал маданиятрал школарду, музыкалул школарду Пионертурал къатлучIасса кружокирттайн кIура баен битан къабучIиссар. Мукун хьун битарча, жува ххаллилсса музыкантътал ва художниктал хьун бувайсса жучIарасса буллугъсса шартIирдацIа хьунтIиссару. Паракьатну, цила кIанайн дуртун ацIрахъул шиннардий жура дуллай бивкIмуницIа хьурча, жуйнма жува хъунмасса зарал ликкан бантIиссар», — тIисса.

БатIаврий чIявусса ихтилатру хьунни му масъалалийн багьайсса. Аьрасатнал Культуралул министерствалул ва ххуллий тамансса давуртту дурну дур ва мукунна хIадур дурну дур оьрчIал маданиятрал школардал статусрайн дагьайсса законопроект.