Ширванинал арс АхIмадов Камил
Ноябрьданул 19-нний хар-хавар бакъасса бивкIулул жуятува личIий унни ГьунчIукьатIрал шяравасса Ширванинал арс АхIмадов Камил.
Камил увну ур 1956 шинал. Буттал шяраву 8 классгу къуртал бувну, яла Гъумук 10 классгу бувккуну, дуклан увххун ур вара шинал Москавуллал гидромелиоратив институтравун. АзарунницIун бавхIуну, кIира шинай дуклайгу ивкIун, зана хьуссар.
Кулпатрал хьуну махъ яхъанай ивкIссар Душанбелив. Бувккуссар Таджикнал паччахIлугърал университетрал экономикалул факультет. 1994-ку шинал зана хьуссар Дагъусттаннайн. Муния мукьах зий ивкIссар хъунмурчIин бизнесраха. Камил ия къатлул ттарцI, щарнил жяматрай аьтIисса, Лакку кIантту ххирасса зунттал арс, жулара, чилли къакуну, цинявннал дакIниймур лаласайсса, дустурал дянив кьимат лахъсса, бувсъсса мукъуй цIу бусса инсан. Тти жун вил кIану бугьансса цучIав къалякъинссар.
Уссихасса ссил
зумалул ххару
Ччувччунни жул ужагъ,
Левщунни вилах,
ЛухIи цIан дагьунни
Чанна къатлувун.
Цинявнналсса буллай,
Жул лагма уклай,
Вилвасса бувансса
Мажал къавхьунав?
Лухччайх уклай занай
Дукъаххай ликри
ХIавтIливух дирхьуну,
Цукун ацIанна?
АцIаву къакIулну
Зузи дай кару,
Ява уссу, хIавтIлил
ЧIувин къадуван.
Жяматрай аьтIийна
Ина икIайвав,
Тти вихлува аьтIун
Цума кьаитав?
Ина жун кунасса
Цамагу уссу
Дяхтта чирахъирах
Гьич къалякъинссар.
Лаккуйн, Лаккуйн тIийна
Мудан икIайвав,
Тти тIурча, абадлий
ЛивчIссарав Лаккуй.
Ми жяматран ккаккан
Рищай суратру
Дязаннив лирчIунни,
Аппарат левщун.
ХIатталлия лухччив
Архнугу дакъар:
ХIурхIа мичча ларай
Ришлай заназу.
Щяриртун нинугу
Зула дяниву
Тих, ших кIиягу арс
ЩябивкIхьунссару:
МакIра къаччимургу
Дяхтта бувкIунни,
Кьаламрал ва мицIгу
Буний бавцIунни.
АхIмадова ХIурия,
23 ноябрь 2020шин
ДакIнийхтунусса кьурчIишиву кIидачIлай, жижара буллай буру ссурваврахь, кулпатрахь, арс-душваврахь ва цинявппагу гъан-маччанахь
ШИРВАНИНАЛ АРС АХIМАДОВ КАМИЛ
дунияллия лагаврийн бувну.
Камил ГьунчIукьатIрал жяматрал дянив хъинну бусравсса уссия. Жул дакIурдиву ва личIантIиссар дакI хъинсса, караматсса, лагма-ялттуцириннан ка-кумаг байсса, чIарав ацIайсса инсан хIисаврай. Камиллул барачат махъ ливчIун лякъиннав, алжаннул ххари уваннав, гьаттай нур дизаннав!
ГьунчIукьатIрал ккуран
Аьли-Буттал арс Адамов ЦIаххуй
Цаппара хIаллай къашавайгу ивкIун, оьрмулул 77 шинаву аьпалухьхьун лавгунни ХьурукIуллал шяраватусса Аьли- Буттал арс Адамов ЦIаххуй.
Увну ур ЦIаххуй 1944-ку шинал ХьурукIуллал шяраву. Школа бувккуну махъ къуртал бувну бур Ленинградуллал жамирду бай институт.
ЗахIматрал ххуллул байбихьулий зий ивкIун ур «Дагдизель» заводрай токарьну, технологну. УвчIуну ивкIун ур заводрал комсомол организациялул секретарьнугу, обком комсомолданул бюрорал членнугу, ВЛКСМ-рал XVI съездрал делегатнугу.
Муния мукьах зий ивкIун ур МахIачкъалаллал машинартту бай заводрай («Авиаагрегат») хъунама инженернал къуллугърайн ияннин. Ванал хIалал дурну дур СССР-нул Жамирду бай промышленностьрал министерствалул чулухасса ХIурматрал грамота ва цайми-цаймигу наградартту ва бахшишру.
Аьли-Бутта аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал кулпат Уммукусумлухь, арс Набинахь, душ Асиятлухь ва махъсса щалагу агьлу-авладрахь.
Цал бунагьирттал аьпа баннав, рухI бигьаний дишиннав.
ХьурукIуллал ва Хьурттал жямат
Цила оьрмулул 61 шин ванил харж дурссар оьрчIан
Шин хьунни жула дянивату личIи хьуну ххаллилсса инсан, хIакьсса педагог, ЧукIуннал шяраватусса Муртазялиева Жамисат Оьмардул душ.
Ххаллилну школагу бувккуну, ванил яла къуртал бувну бур Буйнакскаллал педучилище, мунилва хъирив Дагъусттаннал педагогикалул институтгу.
Жамисат 36 шинал мутталий зий бивкIун бур «Якорек» тIисса оьрчIал садикрай тарбиячину. МахIачкъалаллал 7-мур школалий 25 шинай дихьлай бивкIун бур лакку мазрал дарсру.
Ванил хIалал дурссар «Дагъусттан Республикалул лайкь хьусса учитель» тIисса ларайсса цIа. Ва хъанахъиссар захIматрал ветерангу. Дуссар ванил цайми-цаймигу наградартту.
Жамисат Оьмаровнал чаннасса аьпа абадлий личIантIиссар жулла дакIурдиву.
Даврил уртакьтал,
гьалмахтал, тарбиялувтал
