Дагъусттаннал Экономикалул министерствалул баян бунни октябрь зурул 27-ннийн бияннин кьамул буллай бушиву «Социально-экономическое развитие горных территорий» тIисса программалул конкурсраву гьуртту хьунсса ишбажаранчитурал ва шяраваллил хозяйствалул продукция итадакьлакьиминнал аьрзарду.
Имара Саидова
Программалувух гьуртту хьун ихтияр дуссар хьхьирияр 500 метралул лахъшиврийсса кIанттурдай зузи дурсса инвестициярдал проектирдахь. Дагъусттаннай мукунсса 30-хъул муниципал районнай агьали ялапар хъанахъисса 1000-нния ливчусса кIанттурду хIисавравун лавсун бур.
Зунттал архсса районнай ялапар хъанахъисса агьалинаща программалул конкурсравух гьуртту хьуншиврул, МахIачкъалалийн къабувкIунма, кIантту-кIанттурдайсса МФЦ-дал филиаллайхчIин документру булун бюхъайссар.
Документру кьамул буллай буссар МахIачкъалаливсса Абубакаровлул цIанийсса кучалийсса Минэкономразвитиялул идаралий, кIилчинмур зивулийсса 201-мур кабинетраву.
Шиккува бусан, проектрал лагрулий субсидияртту ласун бюхъайссар:
— дуки-хIачIиялул продукция итадакьаврин ишла дансса оборудование машан ласаврин;
— мюрщисса теплицартту баврин;
— продуктти ядайсса логистикалул центрду баврин;
— промышленностьрал продукция итадакьаврил предприятияртту цIу дуккан даврин ;
— хозяйствардан ишла дансса мюрщисса сельхозтехника машан ласаврин.
