[dropcap]В[/dropcap]ардиш хьуру жува коронавирусрал тагьарданийн. Кьамул дарду оьрмулул цIусса тIалавшиннарду, кIул барду цIуллушиврул кьимат.
Цуксса буруккин бакъая инсантурал дакIурдиву детсадру ва школартту зузи-къазузаврил ялув? Зий байбишавриясса ххаришиврул хьхьичI дацIансса цир дусса, пандемиялия махъсса низам цукунсса духьурчагу.

Ххюва барз хьуссия Дагъусттаннай детсадру къазий. Сентябрь зурул цанния тинмай хIалли-хIаллих тIий зий байбивхьунни шагьрурдалми детсадру. Шяраваллавусса зий байбихьлай бур октябрь зурул цанния тинмай.
Детсадирттал оьрмулул цIусса низамрая буслай бур МахIачкъала шагьрулул 81-мур детсадрал хъунмур Багъдуева Белла Жамаллул душ.

— Беллай, цукун бувкру зу карантиндалул тагьарданува?
— Пандемиялул ккаккан бунни жул зузалтран ва оьрчIал нитти-буттан цивппа кувннан кув ххирасса бушиву, кувннах кув мякь бувккун бушиву. Тарбиячитал мякь бувккун бия оьрчIах, бигьа дакъасса духьурчагу, дакIнил лавсъсса даврийн кIункIу тIий бия. Нину-ппу мякь бувккун бия тарбиячитурах.

ДякъалирчIсса дахIаву ду­ссия оьрчIал нитти-буттал ва тарбиячитурал дянив. Шаппагу оьрчIру оьнма къабивкIссар: гьан дуллай бия жучIан Ххувшаврил кьинилун, Аьрасатнал кьинилун, Да­гъусттаннал Конституциялул кьинилун хас дурсса назмурду ккалаккисса видеортту, мира темардан хас дур­сса суратру.

Жува, детсадрал зузалт, ирглий букIлай бивкIхьурчагу ялтту буккан, цуксса цаннан ца ккаккан ччай бивкIхьурчагу, цалагу хьунакъабавкьуру даврийн букканцIа. ЦIанагу бюхъай­ссаксса мугъаятну буру. Ххарину буру жула хъунмасса ва бавкьусса кулпат цачIунмай шаврия.

— Цуксса даххана хьур детсадрайсса низам, цукун кьамул дури нитти-буттахъал хьусса дахханашиннарду?
— Жул детсад зий байбивхьуссар сентябрь зурул 6-нний, COVID-19 вирусрайнсса тестирдал жавабру дуркIун махъ. Къашавайсса зузалт жучIа цалсса ялун къаливчунни.
Садик зуннин лув ларсса дукиялул сурсат, гьарзад экьидирчуну, цила багьайкун дузал хьу­ссару цIусса дукиялул.
Цалчинсса гьантрай чан­сса бия оьрчIру, гьантлия гьантлийн чIяву хъанай бур. КъабукIлакIисса оьрчIах му чIумалсса багьа къаласласиссар, амма нитти-буттан аьркинссар аьрза чичин, пандемиялуцIун бавхIуну, цуксса чIумуй къагьан уллантIиссарив муттагу кка­ккан бувну.

Гьарца группалувун (15 группа) ласарду цанна-цаннасса термометрия. Температура ххал дайссар кьинилун шамийлла. Бачин бувну буссар термометриялул журналлу.
ТIивтIуну буссар детсадрал кIивагу къапу, ца кIанттай агьлу гьарзасса къабикIаншиврул. ОьрчIру кьамул буллалиссар хIаятраву гьавалий. Шаппай буцайсса чIумалгу буккан буллалиссар хIаятравун. Тарбиячи ва оьрчIру биян бан бувкIсса нину-ппу чара бакъа бикIан аьркин­ссар маскардаву. Му бакъассагу, нитти-буттащал дуллалиссар профилактикалул даву. Агарда шава къашавайсса инсан ушиву ялун личирча, нитти-буттахь тавакъю буллай буру чIумуйнусса оьрчI гьан къауллан, цанчирча оьрчIру цивппа къашавай къахьурчагу, миннал вирус ппив дан бюхъайссар.

Нитти-буттангу дурчI­лай дур тагьар, дакъар хьхьичI­ра диркIсса бувчIа-къабув­чIавуртту, бакьлай бур гьарца тIалавшиннардацIун.
Детсадрал къатрал мукьвагу хьулуву дуссар антисептикру (ми ишла дуллалиссар хъуниминнал, оьрчIал кару шюшин тIурча, ишла буллалиссар хозяйствалул ссахIван). Гьарца группалуву ду­ссар гьава марцI бай­сса затру, зарал бакъасса. Цал­сса щала детсадран мукунсса прибор дур ца, ирглий кабинетирттаву гьава марцI байссар гьарца кьини. Му бакъассагу, цила багьайкун биттур дуллалиссару Роспотребнадзорданул цинярдагу тIалавшиннарду.

[dropcap]В[/dropcap]а шинал ахирданийннин къазузиссар музыкалул ва физкультуралул кабинетру. Ми дарсру цалсса дихьлахьиссар цала-цала группардаву. Гихунмай иш цукун багьавив къакIулли, амма ялунчIил январь зурул цаннийнин къадуллан увкуну буссар утренникру. Цимурца хъирив лаян дан хьун­ссар, так багьлай бур жула жувагу, лагма-ялттумигу бурувччуну бикIан.
— Барчаллагь хъунмасса. ЧIал къархьуну дучIаннав детсадирттал оьрму цила кьаралданийн багьсса кьини!

Ихтилат бувссар
Зулайхат Тахакьаевал