Лакрал театр цIунилгу хьхьичIунминнувух

Лакрал театр цIунилгу хьхьичIунминнувух

Фестиваль тIитIин хьхьичI

Аьрасатнал Культуралул министерствалул, Аьрасатнал Театрал ишккаккултрал союзрал ва Чачаннал республикалул ХIукуматрал сакиншиндарайнува нюжмардий Грозный шагьрулий хьунни билаятрал театрал магьирлугърал оьрмулуву хъуннасса агьамшиву дусса, Щалагу Аьрасатнал миллатирттал театрдал кIилчинмур фестиваль «Федерация».

Бадрижат МахIаммадхIажиева фестивальданул сакиншинначитурахь барчаллагь тIий

Зулайхат Тахакьаева
Цалчинсса фестиваль хьу­ссар ларгсса шинал Театрданул шинан хасну, Аьрасатнал Театрал иш­ккаккултрал союзрал сипталийну ва Аьра­сатнал Магьирлугърал министерствалул кабакьаврийну.
Сакиншинначитал фестивальданул мурадну ккаклай бур Аьра­сатнал миллатирттал дянивсса рувхIанийшиврул ва магьирлугърал арарду цIакь шаву, миллатирттал мазру ва мазурдийсса магьирлугъ дуруччаву.

ХIакьинусса кьини Аьрасатнаву бусса бур ниттил мазурдий зузисса 200 миллатрал театр. Фестивальданий кка­ккан бан миннува Аьрасатнал Театрал ишккаккултрал союзрал Экспертный советрал, хьхьичIра ххал дурсса видеоматериаллал хIасиллайн бувну, язи бувгьуну бур 12 региондалия­сса 14 спектакль. Амма, билаятрайсса эпидемиологиялул тагьар сававну, фестивальданий гьуртту хьун бувкIун бия мяйра региондалиясса ацIва театр: Атнинскаллал Татарнал паччахIлугърал драмалул театр; Балкьарнал паччахIлугърал драмалул театр; Къабардиннал паччахIлугърал драмалул театр; Къазаннал паччахIлугърал чIава тамашачинал театр; Карелиянал паччахIлугърал миллатрал театр; Коми-Пермяцкаллал паччахIлугърал драмалул театр; Ухссавнил АсатIиннал паччахIлугърал академиялул театр; Даргиял паччахIлугърал драмалул театр. Чачаннал паччахIлугърал драмалул театрданул ккаккан бунни кIива спектакль.

Сий хъуннасса фестивальданий гьурттушинна дансса тIайлабацIу цIунилгу хьунни Лакрал паччахIлугърал музыкалул ва драмалул театрданунгу.
ДакIнийн бутанну, хьхьичI­мур фестивальданийгу хъинну ххуйну кьамул бувссия «Камаллул Башир» спектакль. Билаятрал хьхьичIунсса театрал критиктуралгу фестивальданий гьуртту хьусса яла хъунмур ва яргмур труппалун жуласса ккалли бувссия.

 

Чачаннал культуралул министр Хож-Бауди Дааев
ва Чачаннал театрданул
каялувчи Хава АхIмадова

Ва базилух фестивальданий Лакрал театрданул кка­ккан бунни палангнал драматург Ж. Мольердул пьесалийнусса спектакль «Жорж Данден». Режиссер-постановщик Аслан МахIаммадов. Художник-постановщик Дагъусттаннал лайкь хьусса художник Аскар Аскаров.
Спектакль байбишин хьхьичI театрданул каялувчи Бадрижат МахIаммадхIажиевал кIицI лавгунни коллектив ххарину бушиву сий бюхттулсса фестивальданий Дагъусттаннал театрданул магьирлугъ ккаккан дансса тIайлабацIу кIилчингу шаврий.

Аслан МахIаммадов, Саният Рамазанова,
Шамсуттин Къапланов

Пандемиялул тагьарданул ссуссукьушиннардахгу къабурувгун, бувкIун бия биялсса тамашачитал. Кьакъабагьавай гурну хъатру ришлай кьамул бунни тамашачитурал спектакль. Аьрасатнал лайкь хьусса артист Андрей Пашниннул театрданул каялувчи Бадрижат МахIаммадхIажиевахьхьун буллунни фестивальданул диплом.
Театровед Екатерина Морозовал, фестивальданул лишан дуллай, увкунни:
— ДакIний бур ларгсса шиналсса Лакрал театрданул труппалул хъинну аькьилсса, чIявусса жанрарду ишла бувсса хъинну яргсса, этнический журалул спектакль «Камаллул Башир». ХIакьину зул актертурал усттарну ккаккан бунни цамур жанр – Мольердул «Жорж Данден», лавайсса даражалул комедия,- куну.
— Аслан, вил гьунарданул на хIакьинугу хIайран бунна. Кьяпа бивкIссания ликкавияв вил гьунарданул хьхьичI, лачак къахьунссар, — увкунни фестивальданул директор, Чачаннал драмалул театрданул каялувчи Хава АхIмадовал,- ганахьхьун сувенир — «Чачаннал чIюй-къала» буллай.

Бадрижат МахIаммад­хIа­жиевал барчаллагь увкунни фестиваль лавайсса даражалий сакин даврихлу, хъамал хIурматрай кьамул баврихлу.
Спектакльданул кьимат бишлашисса батIаврий Аьрасатнал хьхьичIунсса театрал критиктурал — Андрей Ястребовлул, Елена Покорскаял, Андрей Пашниннул, Роман Мархолиял кIицI лавгунни Лакрал театрданул актертурал творчествалул потенциал лавайсса бушиву. ЧIурчIав дуллай бия Аьрасатнал хъунисса театрдугума хьхьичIун къашай­сса, Мольердул спектакль бишин чIивисса миллатрал театр сисаву хъинну жаваблувсса ша хъана­хъишиврий.

Аслан МахIаммадов «Россия1» каналданул
журналистурахьхьун интервью дуллай

Фестивальданул лагрулий билаятрал хьхьичIунсса режи­ссертурал, театрал ишккаккултрал сакин бувну бия актершиврул, режиссершиврул магьиршиву, сахIналул маз усттар бансса мастер-классру. Фестивальданий гьуртту хъанахъи­сса жагьилсса театрал ишкка­ккултран, актертуран ва Чачаннал паччахIлугърал магьирлугърал колледжрал студентътуран мастер-класс ккаккан бунни Аслан МахIаммадовлулгу. Мастер-класс ккаккан бавриву гьуртту хьунни ГИТИС къуртал бувсса Лакрал театрданул жагьилсса артист Руслан Ларингу.

Актертуран фестивальданий гьуртту хъанахъисса хьхьичIунсса театрдал спектакллугу ххал бан, билаятрал цIанихсса театрал ишккаккултрал мастер-классирттайгу гьуртту хьунсса, нажагь дакъа къадирияйсса сант итакъадакьин, Бадрижат МахIаммадхIажиевал хIарачатрайну, фестивальданий коллективрал бунни шанма гьантта.

Асардал вибувцIусса ва тIайлабацIусса шай чунсса бухьурчагу Лакрал театрданул артистурал аьрххи. Мукун­сса хьунни ва базилухгу. Кабакьиннав Лакрал театрданул коллективрацIун ванияр тийнмайгу, Дагъусттаннал театрал магьирлугърал ттугъ бюхттулну лавсун бачин!

Читайте также: