Ларгсса арвахIкьини Дагъусттаннал БакIчи Владимир Васильевлул муниципалитетирттал хъуниминнащалсса совещаниялий коронавирусрал тагьардануцIун бавхIусса масъалартту ххал бивгьунни. Ванал бувсунни махъсса нюжмардул мутталий чIаланну чан хьушиву республикалул азарханардайн биян буллалими.
-Ларгмунил хьхьичIсса нюжмардий 1633 инсан иян увхьурча азарханардайн, ларгмур нюжмардий иян увну ур 1385 инсан. Вай махъсса кIива гьантлул дянив азарханардая итаавкьуну ур 675 инсан. ХIакьинусса кьини республикалул азарханардай коронавирусрал къашавайми хъин бувайсса кIантту, тахру хIисав бувну, 40 процент бачIва бусса бур.
Гьаннайсса, тагьар лащинсса дакъар. Мукун бухьурчагу, хIура буклан ччяссар ттигу, азар цIуницIа гьалххану ппив къахьун ялув бавцIуну бикIан аьркинссару,-увкунни Васильевлул.
Ванал муниципалитетирттал хъуниминнайн тапшур бунни, кIани- кIанттурдай циксса къашай хьуну буссарив, ци тагьар дуссарив хъирив бавцIуну бикIан ва азарданул гьанулул кюру ялун личин буллалисса статистика нани дуван.
