Дагъусттанналгу, Аьрасатналгу тарихраву ттинин диялну цIакь хьусса цIану дур паччахIнал генерал Минкаил Халиловлул цIа. Чанну-ххину ваная чIявуссаннан бавссар, кIулссар. Амма увагу къакIулну ливчIсса куна чIалай ур ванал ппу МахIаммад Халилов. КIулмургу хъинну чансса бакъа бакъар.

---

Руслан Башаев
Уттигъанну итабавкьу­сса КIаратIиял шяраваллил тарихран хас бувсса Аьлигъазияв Аьли­гъазиевлул автор­сса лу­ттирай цимилагу бусраврай кIицI увну ур жула лаккучу МахIаммад Халилов. Лахъи­сса чIумул мутталий най бивкIсса Къапкъазуллал къизгъин­сса дяъвилувухгу увккун, сагъну ливчIун ур. 1859-кусса шинал, Шамил ясир увну мукьах, паччахIнал хIаписар хIисаврай, М. Халилов ивтун ивкIун ур КIаратIиял жяматрал ялув.

МахIаммад увну ур Хьурттал шяраву, дуклай ивкIун ур Гъази-Гъумучиял мизитрачIасса мактабрай. Яла бувккунугу бивкIун бур Каирдал цIанихсса университет «Аль-Азхар». Бур хавар ва Шамиллул найпну ивкIссар тIиссагу. Амма ва цуксса мяйжанссарив къакIулли.

1877-ку шинал паччахIнайн къарши­сса бунт сукку дурну диркIсса ппурттуву бунтрал каялувчину увчIуну ивкIсса Ссугъращиял МахIаммад-ХIажинал КIаратIиял наибну ивтун ур кIара шяраватусса Кьарабил ХIажи тIисса инсан. Муниннин ивтун ивкIсса МахIаммад Халилов тIурча, ккаккан увну ивкIун ур бунтрал дайдихьулийва ухлаган уван – цала агьлу-авладращал архIал. Амма цIуну найпнал къуллугърай ивтун ивкIсса Кьарабил ХIажи къасивсуну ур му бигар биттур буван – яни Халилов цала кулпатращал архIал арестовать ан. Му мурад бартбигьин тIисса кьасттирай увкIунгу ивкIун ур Кьарабил ХIажи КIаратIав цала нукартуращал архIал. Му данди бацIаврил ххуллий КIаратIиял жяматрал, цала шяравучугу чулухух ивхьуну, сайки циняв ца хьуну, Халиловлухлу бувккун бур ва мунацIухсса бангу къабивтун бур.

Му иширайн бувну жущава учин бюхълай бур ацIния мяйра шинай КIаратIиял жяматрал бакIчишиву дуллай ивкIсса ла­ккучу М. Халиловлул цIа жяматрал дянив хъинну хъунмасса хIурматрай диркIун дур куну.

МахIаммадлул бивкIун бур кIия арс Минкаил, Юсуп ва ца душ Шагьун – Парижлив Хъин хъаннил институт бувккусса лакку хъамитайпа. Миннал дянив ца яла цIа дуркману хьуну ур Минкаил. Ва увну ур 1869-ку шинал Хьурив, ивкIуну ур 1936-ку шинал Туркнаву. Ванал бувккуну бивкIссар Ставрополлал кадетътурал гимназия, Ттуплисуллал юнкертурал учкъула ва Парижуллал Аьраяллил академия (ванащал архIал ккалай ивкIссар ванал дус, ялунсса Туркнал цалчинма Президент Мустапа Камал Ата-тюрк.

Минкаиллул буттал чулийнмайсса КIаратIиял жяматрал хIурмат ва бунтрал чIумал миннал му уруччаву хъинну лявкъу­ссар яла махъ, Граждан дяъвилул чIумал, цанма кIаратIиянгу. Ми шиннардий Аьрасатнал армиялул генерал-майор Минкаил Халилов ивтун ивкIссар Дагъус­ттаннал аьраяллил иширттал каялувчину. КIаратIиял чулданийн кIяла армиялул аьскартал бувк­сса чIумал, кIяламиннал ка къаларссар КIаратIиял агьалинайн: миннан кIулну бивкIссар, агарда ка лаярча, цала командир Халиловлул цанма банмур. Минкаиллул оьрчIшиврул биялсса бутIа бавхIунугу бивкIун бур цала ппу найпну ивкIсса КIаратIиял щарнил жяматрацIун ва бивкIун бур кIиччасса оьрчIнийсса чIявусса дусталгу.
Цуксса хIайпнугу, Минкаиллул буттал МахIаммадлул сурат яхьуну дакъар, лякъин къабювхъунни. Ци кIулссар, балики ча-дунугу ялун личин, хьулвагу бакъанува лякъин.