«Ттун ина дакIний ливчIунав ва найбуна бувчIунна»

Сентябрь зурул 23-29-нний Дагъусттаннай Поэзиялул театрдануву хьунни «Воспевшие Дагестан» тIисса Шамилчинсса Республикалул театрдал фестиваль-конкурс .

Зулайхат Тахакьаева
Республикалий эпидемиологиялул тагьар нигьачIисса душиврийн бувну ва базилух фестиваль хьунни тамашачитал бакъанма. Постановкардал тIайланнасса трансляция дия YouTube-каналданий.
Гьашину фестивальданий гьуртту хьунни ацIния кIивагу паччахIлугърал театр.

Ва фестиваль сакин дурссар 2016 шинал Дагъусттан Республикалул ХIукуматрал, Дагъус­ттаннал хьхьичIунсса шаэртурал, чичултрал ирсирах ва творчествалул ххуллух жяматрал къулагъас дан баву, режи­ссертурал ва актертурал устталугъ машгьур даву, сахIналул магьирлугъ хьхьичIуннай даврицIун кабакьу баву мурадрай.

Уттисса фестивальданийн театрдал хIадур бувну бия шаэртурал оьрму ва творчествалул ххуллу гьануну лавсъсса литературалул композицияртту.
Жюрилуву бия Дагъусттаннал ва Аьрасатнал магьирлугърал хьхьичIунсса ишккаккулт: Гулизар Султанова, Айгум Айгумов, МахIаммад АхIмадов, Хамис Шамилова. Жюрилул хъунаману ия Ухссавнил АьсатIиннал паччахIлугърал академиялул театрданул режиссер Тамерлан Сабанов (Владикавказ).

ДакIнийн бутанну, хьхьичIсса кIира фестивальданий Апанни Къапиевлул цIанийсса Лакрал паччахIлугърал музыкалул ва драмалул театр цалчинмур кIану бугьан лайкь хьуссия «Ккурккуллал Щаза» (режиссер-постановщик Дагъусттаннал халкьуннал артист Аслан МахIаммадов) ва Апанни Къапиевлул аьрали чичрурду гьануну лавсъсса «Невыплаканные слезы» спектакллахлу (режиссер-постановщик Аьра­сатнал лайкь хьусса артист Ислам Казиев)
ЦIанасса фестивальданий Лак­рал театрданул ккаккан бунни

Гъумучиял ПатIиматлул ва Бархъаллал Маллайл оьрмулия шаэр Сибирбаг Кьасумовлул чивчусса «Ччаву ва макь» тIисса пьесалул композиция (режиссёр-постановщик Аслан МахIаммадов).

— Ттун ина дакIний ливчIунав ва найбуна бувчIунна»,-тIий ия Гъумучиял ПатIиматлул ниттил Аймисайл роль дургьусса Жинасат ДинмахIаммадовахь Тамерлан Сабанов.
— 2011 шинал «Сцена без границ» тIисса Дунияллул халкьуннал дянивсса миллатирттал театрдал фестивальдания (Владикавказ) зу ма­хъунмай лавгссияв ххюва номинациялувасса шамунниву ххув хьуну: Лоркал «Бернарда Альбал къатта» спектакль лайкь хьуссия «Лучший спектакль», «Лучшая режиссура» ва «Лучшая женская роль» дипломирттан.

Та чIумалгу на хIайран увунав Бернардал роль дургьусса актрисал – Жинасат ДинмахIаммадовал тIуркIулул.
ХIакьину зул спектакль ххал буллалийнигу ттул дакIниву хIасул хъанай бия совет заманнул цIанихсса режиссер Сергей Параджановлул фильм ххал дуллалисса кунмасса асарду,-увкунни жюрилул хъунаманал.