Октябрь зурул 16-нний МахIачкъалалив хьунни Ниттил мазру лахьхьавриха зузисса центрданул итабавкьусса луттирдал презентация. Шикку гьуртту хьунни Республикалул Халкьуннал мажлисрал депутатътал, луттирдал автортал.
Имара Саидова
Дусшиврул къатраву презентация дуллай бия «Агъуллал магьри», «Яруссаннал мазрал синтаксисрал очеркру», «Телесный код культуры паремиологической картины мира дагестанских языков», «Язык и поэтика Г. Омаровой в межкультурной коммуникации» тIисса луттирдал.
Презентациялул мажлис тIитIлай, ДР-лул миллатирттал политикалул ва диндалул иширттал министр Энрик Муслимовлул бувсунни центр тIивтIуния шинмай итабавкьушиву дагъусттан автортурал миллатирттал мазурдил лингвистикалия, культуралия ва тарихрая чивчусса 16 лу. Ванал мукунма кIицI лавгунни маз сахла баврийну жула багьу-бизу, аьдат-эбадатру дуруччинсса сант ххишала хъанахъишиву.
— Миллатирттал мазру лахьхьавриха зузисса центр хIадурссар дагъусттаннал миллатирттал мазру буруччаву мурадрай захIмат бихьлахьисса автортурал чIарав бацIан, — увкунни Энрик Муслимовлул.
ДГУ-лул ректор Муртазааьли Рабадановлул лавайсса кьимат бивщунни, миллатирттал мазру сахла баву мурадрай, центрданул дачин дурсса ва ххаллилсса проектран. Барчаллагь увкунни министерствалул дуллалисса даврихлу ва миллатирттал мазурдиха зузисса автортурахь.
Центрданул директор Марина ХIасановал кIицI лавгунни луттирду итабакьаврил давриха хъунмасса захIмат буллай бивкIшиву тамансса автортал. Ванил мукунма бувсунни луттирдал тиражру школардал библиотекарттайх дачIинтIишиву.
Хъирив ихтилатру бунни луттирдал автортурал ва бусравсса хъамаллурал.
Ахирданий Энрик Муслимовлул бувсунни Миллатирттал мазру лахьхьавриха зузисса центрданул даврин ххишаласса арцу итадакьлан най бушиву.
