РяхцIалунния ливчусса школарду гьуртту хьунни октябрь зурул 17-нний МахIачкъалалив, «Аьрасат – ттул тарихри» тIисса паркраву хьусса мюрщи инспектортурал проектраву. «ЮИД Ро­ссии» (юные инспектора движения России) цIанилусса проект хIадур дурну дур Аьрасатнал МВД-лул Госавтоинспекциялул КIулшивуртту дулаврил министерствалущал ва «НигьачIаву да­къасса ххуллурду» ООО-лущал цачIу , оьрчIру ххуллул низамрайн аьдат баву ва ми мюрщи инспектортурал кьюкьравун кIункIу баву мурадрай.

Акциялий гьуртту хьунни МахIачкъалаллал цинявппагу школарду, 2500-нния ливчусса дуклаки оьрчIру.

---

Ва кьини оьрчIал ххал бан паркраву тIивтIуну бия ацIва площадка: автогородок, цалчинсса медициналул кумаг, профориентациялул даву ва м.ц.
«ЮИД» сакин дурну 47 шин хьуну дур.

Суккушиндарал кьюкьраву бур 400 азарунния ливчусса оьрчIру.
— Оьрму баххана шаврийн бувну, суккушиндарал дуллалимунивугу цин лархьхьусса дахханашивуртту дан багьлай бия. Гьашину жула коллега­хъащал архIал, жу цаппарасса цIушиннарду дарду. Ми аьч дуллалисса площадкартту тIитIарду хIакьину шикку.

Вай гьарзат ххал дурну, оьрчIал пикри бантIиссар, бу­ххан бурив мюрщи инспектортурал кьюкьравун. Госавтоинспекциялул зузалтран кумагчитал шаву бакъассагу, вайннаща бюхъантIиссар мюрщину бунува цанма пиша язи бугьан.

Мюрщи инспектортурал кьюкьраву оьрчIан чIалачIиссар хьун­ссарив цащава зун автоинспекторталну, ххал бан хьунтIиссар машиностроениялул зузалтрал, ххуллул инженертурал пишарду.

Цалчинсса медициналул кумаграл чIалачIиндарайнугу вайннан бувчIинтIиссар чIявусса затру. Умуд бур хIакьину ши­кку гьуртту хъанахъисса оьрчIру мюрщи инспектортурал кьюкьравун бухханссар тIисса,- увкунни ва проектрал давриха зузи­сса директор Валентина Кулбицкаял.