[dropcap]В[/dropcap]ай гьантрай Республикалул онкологиялул центрданий дагъусттаннал хIакинтурал цалчин бунни хъазамрал дурухлу дусса,
нигьачIийсса тагьарданухун багьсса хъамитайпалий онкопластикалул операция. ЖучIава уттинин къабуллай бивкIсса операция цалчин буван бакIрайн лавсъсса жагьилсса хIакин-онколог ур Ккуллал шяравасса Ажувлул арс Мурачуев Мирза.
Гистологиялул ххал бигьавурттал тасттикь дурсса 2-мур даражалул дурухлу дусса хъамитайпалий Мирза Ажубовичлул Дагъусттаннай цалчинни, хъазам сахла бувну, дурухлу дукьан дурсса. Шиккува кIицI лаган, уттинин жучIава укунсса журалул операцияртту дурухлу дусса хъазам кьувкьуну бувайсса бивкIссар.
— Химиотерапиялул мяйва курсгу бувну, хъамитайпалул чурххал базу сахла бувну, дурухлулуцIа марцI буккан бувсса операция бувссар. Мунийн бувну, къашайшала захIматсса азардануща ххассал баврищал архIал, жуща бювхъунни ванил хъазамгу сахла бан. Шанна ссятрал мутталий най буссия операция. Ва методрай бувсса операциялул агьамшивугу дур, чурххал базурду сагъ-саламатну ябувну, къашайшалан стресс хьун къаритаву.
Гихуннайсса жулла давриву ва метод ишла даву нирхиравун рутансса ниятрай буру. ЦIуллу-сагъшиву дуруччаврил министерствалул дурсса сияхIрайн бувну, хIакьинусса кьини дурухлурдал азардаву хъазамрал рак бусса яла чIявуми къашайшалт бур Дагъусттаннай, — тIий ур Мирза Мурачуев.
— ХIакиннал пиша бур ххишаласса жаваблувшиву дусса. Мунияту, цала даву дакIнихтуну даврицIун, нахIусса мукъуйнугу инсантал хъин буллан багьай. На хъин буллалисса къашайшалт цивппагу бур ххишаласса къулагъас дан аьркинсса. Операцияртту бувну хъин баврицIун, ттун ми, дакI данмур бувсун, рахIат буккан буллангу багьай. Миннан кIанттай жува бивкIссаниягу, жуннагу къаччанссия жухрасса биччибакъасса бургаву, — тIий ур Мирза Мурачуев.
Онколог-маммолог, дерматоскопиялул пишакар Мирза Мурачуев ччясса мутталий машгьур хьуну ур Дагъусттаннай акъассагу, республикалул кьатIувгу. Ванал буттал буттауссу, АьФ-лул лайкь хьусса хIакин, МахIмудлул арс Мурачуев АхIмадгу цIа дурксса ва машгьурсса хирург ур.
Марина Дибирова
