ДР-лул ХIукуматрал Председатель Артем Здуновлул каялувшиврий хьусса коронавирусрал инфекция ппив шаврил тагьарданий экономика лядуккаврил оператив штабрал батIаврий махъ лавхъунни ДР-лул Роспотребнадзорданул управлениялул каялувчинал хъиривчу Лариса Пантинал.

---

ХIасан Аьдилов
[dropcap]М[/dropcap]унил тIимунийну, июньдалул 15-нния шинмай, ссуссукьушивуртту чан дурну махъсса цалчинмур ятIапрай, ихтияр дуллуну диркIссар дайдишин къадукиялулми машлул объектирдал ва цаппара журардал хIаллихшинну даврил давур­тту. Ми 14-гу гьантлий ­оьмур чулийннайсса дахханашивуртту къархьунни. Эпидемиялул лагрулий хъин чулий­сса динамикагу хIисавравун ларсун, бучIиссар ккалли дуван республикалий хIакьину ссу­ссукьушивурттавату буккаврил кIилчинмур ятIапрайн бучIансса тагьар шаврин. Мунияту цаппарасса журардал объектирдан бучIиссар хIадур хьун давур­ттайн буккан.

Давуртту дайдишин ихтияр дуллуну дур 800 кв.м. ду­сса машлул объектирдахьхьун, оьрчIал багъирдахьхьун, яслирдахьхьун, амма къадагъа дирхьуну дур микку чIявусса инсантал бавтIсса мероприятияртту дуллалаврий. Ихтияр дуллуну дур мукунна тIитIин гъинтнил ларзурду, каферду ва ресторанну (так кьатIувминнуяр ихтилат), агарда миннал щаллу дулларча санитар-эпидемиологиялул тIалавшиннарду.

Лариса Пантинал тIи­му­нийну, давурттайн хIадур хьун бучIиссар мукунма дуккаврил документру кьамул байсса комиссиярттан, амма миннангу аьркинссар коронавирусрал инфекция дакъашиву ххал дигьлан. Лариса Пантинал ляличIину къулагъас дунни 65 шин хьуминнах. Миннан аьркинссар манзилданий зун.
— Циняв идарарттал зузалтрал ишла дуллан аьркинссар маскарду ва катIри. Мукунна­сса низам дуручлан аьркинссар жяматийсса транспортрайгу, инсантал бавтIсса кIанттурдайгу, — увкунни мунил.