Шяравалур ттул чIиримур Ватан

Аьрасатнал цайми регионнай кунма, жулла республикалийгу баян бувну буссар «Ттул чIирисса Ватан» тIисса цIанилусса, гьунардал конкурс.

Ванил сакиншинна дурну дур Аьрасатнал шяраваллавусса Жагьилтурал союзрал ва АьФ-лул Шяраваллил хозяйствалул министерствалул.


З.АьбдурахIманова
Конкурсрал мурад бур шяраваллаву яхъанахъисса гьунар бусса жагьилтурал цIарду ялун личин дансса ва миннал давурттайхчIин шяраваллу дуруччинсса, цалла чIирисса ва аьзиз­сса Ватандалия пахру бусса жагьилтал тарбия бансса. Жулва билаятрай ва журалул даву дуллай 11 шинни. Конкурсрай гьуртту хьун оьвтIий бур 14 шиная 35 шинавун бияннинсса жагьи-жугьултрайн.

Гьуртту хьун гъира буминнаща аьрзри булун ягу аьркинсса информация кIул бан бюхъантIиссар «Шяраваллил культуралул ва тарихрал ирс» тIисса порталданийхчIин. Конкурс бавчIуну бур «Шяраваллил чувшиву», «Хъудугьултрал мархри», «Аьрасатнал миллатирттал аьдатру ва касмурду», «ХIакьинусса кьинирдал шаэр», «Шяраваллил блогер» ва мукунма цаймигу цIардалусса номинациярдайх. Конкурсрайнсса давуртту августрал 15-ннин кьамул дуллантIиссар.