[dropcap]М[/dropcap]уданмагу кьадру-кьимат лавайсса хIакиннал пиша хъиннува бусрав хьунни, жуйнна захIмат-жапасса цIуцIаву дирукун. ЧIявусса хIакинтал нигьачIаву дусса кIанттай, цаламигу,
кулпатралмигу буруккинтру махъ бивтун, азарданухьхьун биривми ххассал буллан бивкIунни. Му бусравсса кьюкьлувасса цану хъанай ур Аьлил арс Сулайманов Шарипгу.
Шарип Ахъушиял райондалийсса Уручуллал шяравасса ур. ХьхьичIва,махъсса жяматирттах бурувгун, уручул хъинну элмулухун багьсса бикIайва. Уручратусса, сайки 15-20 учитель цайми щархъай зий бивкIссар. Амма медициналул кIулшиву ларсъсса чансса бикIайва.
Райондалий хьхьичIра-хьхьичI хIакиншиврул ларайсса кIулшиву 1942 шинал ларсъссар уручра душ МахIаммадова Ххамислул. Му чIярусса шиннардий Ахъушав хъун хIакинну зий бикIайссия. Мунияр махъ райондалий хIурматрай зун ивкIуна Уручратусса Кьадиев Кьади ва ХIажиев ХIажи. Уттигу, личIи-личIисса шагьрурдай, ххуйну зий бур Уручратусса мадарасса хIакинтал.
Махъсса шиннардий халкьуннан бусрав хьунну зий ур Сулайманов Шарипгу. Шариплул ас-намус, яхI бушиврух урувгун, ттун дакIнийн багьай: «Гьивч мурхьирая архну къабагьайссар», — тIисса махъру.
Мяйжаннугу, Шариплул ппу Аьли, нину Раисат гьарца чулуха эбрат ласун лайкьсса инсанталли. Вай кIиягу ДГУ-лул физикалул факультетрай архIал ккалай, кIинналагу ятIул дипломру лавсъссия. КIиннахьвагу аспирантуралувун буххан бачияра т1ий бия. Раисат рязи къавхьуну, профессортал хIайп тIун бикIайва, ванил гьунарданий махIатталну бикIайва. Раисатлул, ххюра шинай ккалай, мукьцIалунния лирчусса экзаменнай бувагу ца мукьва лавсун бия, мугу цалчинмур сессиялий чIиппир-кьиматчинал бивхьуну.
Аьлил ппу МахIаммадсани ва Раисатлул ппу МахIаммадхан, Хъундяъвилул цIаравух бувксса, жяматран бусравсса инсанталъя. Раисат ва Аьли дуклакисса шиннардий на математикалул кафедралул хъунаману уссияв, ми гъаншиву дусса бухьувкун, хъиннува пахру бикIайва. Миннал шама арс ур, шамагу эбрат ласунсса. Шарип хъунамари. 2005-ку шинал Самара шагьрулий Аьралий медициналул академия ххаллилну къуртал бувну махъ, му личIи-личIисса госпиталлай хъун хирургну зий ивкIссар. Махъ, Къазаннал РКБ-лий хирургну зий уссия. 2013-ку шинал, кулпатрангу ччай бухьувкун, Дагъусттаннайн ивзунни. ЦIана зий ур МахIачкъалаллал ца азарханалий хирургиялул отделениялул хъунаману. Апрель зуруя шинай зий уссар «ятIул зоналий», коронавирусрал къашайми ххассал буллай.
Цала пишагу кIулсса, къашайшалтрахгу уругайсса, архIал зузиминнащалгу хIал бавкьусса унутIий, даврий Шариплуйн: «Ва жул пахрур», — учай. Уттигъанну Шариплун дуллунни «Дагъусттан Республикалул лайкь хьусса х1акин» т1исса хьхьичIунсса цIа. Му цIагу дакIнихтуну барча дуллай, чIа тIий буру Шариплун лахъисса, цIуллу-цIакьсса оьрму, цIу-цIусса тIайлабацIуртту, ххаришивуртту.
ХIажи МахIаммадов,
ДГУ-лул ва ДГУНХ-рал
профессор
