Цалчин, хъунмасса барчаллагь учин ччай ура, жунма цинявннан ххирасса, хIурмат бусса «Илчи» кказитрал редакциялухь! «Илчилул» кумаграйхчIин кIул хьунни ччянияцIа нава луглай, кIул буллай ивкIсса ттула буттауссу Хавчаев ЖахIпардул бакIрачIан бувкIмур.
Январьдания байбивхьуну, кказитрал ляличIисса ургъил бунни, гьашину Хъунмасса Буттал кIанттул цIанийсса дяъвилий ххув хьуну 75 шин шаврил юбилейрах. Рирщунни чIярусса му таварихран хас дурсса макьалартту, суратру, дакIнин бичавуртту.
Дяъви къуртал хьуну 75 шин хьуну духьурчагу, уттигу га дяъвилуву жанну харж дурминнал аьдад аьщуйн щунну кIулну дакъар. Жул чIирисса Кьукуннал шяравагу, цаймигу лакрал щархъава кунма, душманная Ватан дуруччин Хъун дяъвилийн лавгун ур 45 инсан.
Зана къавхьуну ур 22. Миннавасса цану хъанай ур ттул буттауссу Хавчаев ЖахIпар АьвдурахIиннул арсгу.
Цимирагу шинъя ттул дяъвилия зана къавхьусса буттауссу ЖахIпардул кьадарданул хъирив лаллай. Чикъавчусса кIанттурду къабивтссия: Обороналул министерство, Подольск шагьрулийсса архив, «Память народа», «Подвиг народа», «Мемориал» ва мукунма цаймигу идарартту. Амма чачIав вари чинсса зат аьлтту бан къавхьуна, ххал дуллай буру, лякъинну-хьунну тIисса бакъасса.
Яла ттун бакIрайн дагьуна Лакрал райвоенкоматрал кьюлтIсса (секретныйсса), дяъвилийн лавгсса ва ятIа-тIар бакъа бакъахьусса арамтурал сияхI. Амма ми чув талай бивкIссарив, чув бат хьуссарив цичIав бакъая. Гьаманки, му сияхIрай цайминнащал архIал дия ттул 22 шинавусса буттауссил ЖахIпардул цIагу. Му сияхIрайн бувну, Кьукуннал шярава ца кьини, 1942-ку шинал 8-мур мартрай, дяъвилийн лавгун ия мяйя жагьил: ХIасанов Щайху, Мусаев Муса, МахIаммадов Муттин, АхIмадов Муса, АхIмадов АхIмади, Кьадиев Расул, Сулайманов МахIаммада, Рамазанов Муса.
Мура чIумал, Ржевск шагьру мурахас буллай, битултрал взводрал командирну талай ивкIун ур ЖахIпардуяр хьхьичI, 1940–ку шинал армиялийн увцуну ивкIсса уссу, лейтенант Хавчаев КьурбанмахIаммадгу.
Вана, гьашину февраль зуруй бувксса «Илчилул» 7-мур ва 8-мур номерданий хьунадаркьунни Краснодардал крайрайсса Северский райондалий талай ливтIусса дагъусттанлувтурал сияхI. Миннавух дия ттула буттауссу ЖахIпардул цIагу. ТIайламур бусан, ттуйна нава вих къахъанай, цимиллагу ккалай ивкIра му сияхI. Му сияхI цачIун дан ва кказитрайн тIайла дуккан хъунмасса хIарачат бувну бур жула лакку инсан Шамхалова Маржанатлул. Ххишала бакъа, хъинну хъунмасса барчаллагь тIий ура мунихьгу. Муния гихунмайгу Маржанатлул хъунмасса кумаг бунни Смоленское тIисса станицалийсса школалул Краеведениялул музейрал директор Ирина Михайловна Еременкощалсса дахIаву дангу. ХIасил, ахиргу кIул хьунни ттула буттауссу увччуну ушиву Смоленское тIисса станицалийсса «уссурваврал» гьаттаву. Му мяйжан шайхту, ттул бакIравун цалчин бувхсса пикри хьуна, лавгун та гьаттайн, циняв гъан-маччанал чулуха алхIангу буккин ва тIутIал кацIгу бишин. Амма чарив къакIулну ялун дирсса коронавирусрал ссуссукьушивурттайн бувну гьан къавхьуна. Инша Аллагь, чансса ишру паракьат шайхту, чара бакъа гьантIиссару.
Талай ивкIун ур ЖахIпар Ккавкказ фашистурая мурахас буллай бивкIсса 20-мур Горноспасательный дивизиялул 379 полкраву, цалчинмур миномётирттал роталуву.
Тарихчитурал чичлачимунийн бувну, му дивизиялун багьну бур яла агьаммур ва къизгъинмур талатаву дуллан Ккавкказнаву. Цуксса гужсса талатавуртту диркIссарив буслай бур укунсса сияхIрал: Ккавкказуллал агьаммур бурхIай (хребетрай) 10 зурул мутталийсса талатавриву му ца дивизиялува ивкIуну ур 2168 талатала, щаву дирну дур 4306-ннайн, ятIа-тIар бакъа акъа хьуну ур 7249 талатала!
Мяйжаннугу, «Илчилий» рирщусса му сияхIрайну чIалай бур, циксса дагъусттанлувтурал жанну харж дурссарив му талатавриву! Цинявнналагу бунагьирттал аьпа баннав!
Шиккува бусан, Хъунмасса Буттал кIанттул ц1анийсса дяъвилий жанну дуллуминнал аьпа абад бан, Кьукнив дурну дуссар ЧIаратусса художник Султанов МахIаммадлул проектрайсса, ляличIисса мемориал-комплекс. Микку цанна-цанналу дацIан дурсса мармарчарил улттуй чирчуну дуссар аьрая зана къавхьусса гьарцагу кьукничунал цIа.
Нурислан
Хавчаев
