[dropcap]В[/dropcap]ай гьантрай «Вирттал» тIисса Давуд Амиров бакIчисса лакрал суккушиндарал вакилтурал аьрххи бия Ккуллал шяравун. Вай бувкIун бия апрель зурул ахирданий баян бувну бивкIсса Хъунма­сса Буттал кIанттул цIанийсса дяъвилухасса шеъри буккаврил конкурсрай ххув хьу­сса,

83 шинавусса ПатIимат ХIайдаровачIан, ванил диплом ва арцуйнусса бахшиш ларсун. ПатIиматлул цалчинсса кIану бувгьуссар 35 шинавату лавайминнаву оьрус мазрай ва лакку мазрай дяъвилухасса шеъри бувккуну.

ДакIнин бутан, конкурс баян бувну буссия Хъунма­сса Буттал кIанттул цIанийсса дяъвилий Ххувшаву ларсун 75 шин шаврин хасну. Ваний гьуртту хьуссия азаруннийн бивсса инсантал. ХIасиллу дурссия июнь зурул 25-нний МахIачкъалалив. Сакиншинначитуран пикри хьунни му чIумал цила наградалул хъирив бучIан къавхьу­сса ПатIиматлучIан му дулун шаппай гьан. ПатIиматлул ххарину кьамул бунни бусравсса хъамал. Дипломгу,бахшишгу ванихьхьун хIурматрай дуллунни Давуд Амировлул. Жагьилтурал рирщунни Па­тIиматлущал дакIний ли­чIансса суратругу.

Андриана Аьбдуллаева