[dropcap]Х[/dropcap]ъунмасса Буттал кIанттул цIанийсса дяъви байбивхьусса июнь зурул 22-сса кьини Аьрасатнал билаятрай кIицI лагай­ссар Хъамакъабитулул ва хIасратрал кьини.

22 июнь Хъамакъабитулул ва хIасратрал кьинину баян бувссар 1996-ку шинал Аьрасатнал Президент Борис Ельциннул хIукмулийну. Ва кьини щалагу билаятрай хIурматрай дакIнин бичайссар Ватан дуручлай жанну дуллусса цинявппагу вирттал.

---

Андриана Аьбдуллаева

Ватан душманная дуру­члай къучагъшиврий жан дуллуссар цимигу лаккучуналгу. Миннавасса ца ур Хъювхъиял шяравасса ХIаснил арс ­Аьлил Сулайманов. Аьлил увцуну ур дяъвилийн 1941-ку шинал. Ватан душманная дуручлай гьур­тту хьуну ур цикссагу къизгъин­сса талатавурттаву. Жан дуллуну дур 1944-ку шинал Украиннал аьрщарай. Ккавкнал бусласимунийн бувну, щаву дир­сса командир гьаз увну нани­сса Аьлил снайпернал ккуллалул увтун ур. Увччуну ур ва Львоврал чIаравсса Броды шагьрулийсса уссушиврийсса гьа­ттаву. Аьрая бувкIсса Аьлиллул ча­гъарду яхьуну бакъар. Буккин къакIулсса кулпатрал кIулначIан буккин лавсун лаглай, бакъа-къатIа хьуну бур. Амма Аьлиллул аьпалун уттинин яхьуну бур ванал дяъвилийн гьаннин хьхьичI цала аьзизмунин Марижатлун бурув­ххуну бивкIсса ттуплив. Ва ­уссал усттар ивкIун ур. Ши­ккува бусан, Аьлил жула АхIмад АхIмадовлул ниттил ппур. Укунна Ватан дуручлай жан дуллу­сса АхIмадлул буттал буттаягу на хьхьичIва чивчуссия («Илчи» № 20. 15 май 2020 ш. лаж.10). Жяматрал бусласимунийн бувну, Аьлил кIулшивуртту дусса, чIумух бурувгун, хьхьичIун ливчусса адамина ивкIун ур, ваначIа чIявусса луттирду бивкIун бур. Аьлил дяъвилийн лавгун ур мукьва мюрщисса оьрчIгу кьабивтун.

Бутта чIарав акъанугу, минная цинявнная дур­ккусса, итххявхсса, жяматраву бусрав­сса инсантал хьуну бур. Хъунмур душ Сагъират ЦIуссалакрал райондалий учительну, коммунист партиялул Ккуллал райкомрал 3-мур секретарьну, Да­гъусттаннал коммунист партиялул обкомрал орготделданул инструкторну, Дагъусттаннал ПрезидентначIасса Хъуни­сриннал советрал председательнал кумагчину ва цаймигу жаваблувсса къуллугъирттай зий бивкIун бур.

Арс Малла «Авиаагрегат» заводрал хъунама инженерну ивкIун ур. ЧIярусса шиннардий Туркманнаву Мары тIисса шагьрулий­сса заводрал директорну ивкIун ур. Душ СултIанат (АхIмадлул нину) Аьрасатнал кIулшивуртту дулаврил отличникри, Дагъус­ттаннал лайкь хьусса учительли. Хъунмасса захIмат бивхьу­ссар Хъювхъиял школалий учительну зий.

Шамилчинмур душ Сусанатгу учительницар. Зий бивкIссар Нугъайнал райондалий, Терекли-Мектеб шяраву. Вайннал цинявннал оьрчIаягу ххуйсса тарбия ларсъсса, ххаллилсса инсантал хьуну бур. Буний ябаннав Аллагьнал.