[dropcap]И[/dropcap]юльданул 6-нний ва 7-нний Аьрасатнал регионнал школарттай оьрус мазрал ЕГЭ кьамул дуллай бия. Жулла республикалий вай гьантрай экзамен дуллуну дур гьашину ва хьхьичIми шиннардий школа къуртал бувсса 10 азараксса выпускникнал.
З. АьбдурахIманова
Дагъусттаннай цалчинмур кьини оьрус мазрал экзамендалул цалла кIулшивуртту ккаккан дурну дур 7813 дуклаки оьрчIал, кIилчинмур кьинигу — 1913 выпускникнал. Ва агьамсса дарсирал экзамен жулла республикалий кьамул дурссар 20 школалий. ЦIанасса нигьачIисса тагьаргу хIисавравун ларсун, экзаменну нанисса циняв школарттай хъуннасса къулагъасралун лавсун бур дуклаки оьрчIру, ккучунну дан къабивтун, цанная ца архну бацIансса шартIру дузал даврих.
Экзамен дайдишин хьхьичI классирттавусса партарду, кIантту, нузкьунтту лирхьуну антисептикрай, гиву ишла дурну дур гьава марцI бансса приборду.
Оьрус мазрал экзамен хъанахъиссар чIявусса оьрчIал дулайсса, вузирдаву гьар кIанай аьркин шайсса экзаменну. Ва дулуншиврулгу гьашину жун багьлай бия, Роспотребнадзорданул жуятурасса тIалавшиннардугу щаллу дурну, оьрчIал цIуллу-сагъшиву хьхьичIун ласун. Цалчинмур кIанай ва масъалар бусса ЕГЭ дуллалисса кIанттурдай экзаменнал ялув бавцIуминначIа. География, информатика дуллалисса ЕГЭ-дал цалчинмур кьинигу жулла республикалий хьунни паракьатсса, цичIав дайшишру, дахчиннарду хIисав къархьусса. Укун паракьатну гьанхьуви тIисса умудрай буру жугу экзаменнал кампания,- увкунни ЕГЭ дайдишин хьхьичI МахIачкъалаллал школарттал ялтту бувксса премьер-министр Уммупазил Оьмаровал.
ЕГЭ дулун школалувун бухханнин медициналул зузалтрал ххал дуллай буссар оьрчIал температура ва цаймигу симптомру дусса-дакъасса. Аудиториярттаву оьрчIру щябивтун буссар шахматирттай буккайсса кьяйдалий. Агьлу бувкIун, ккучунну дурну школардал хьхьичI къабатIланшиврул, гьарнахь ччянива буслай, баян буллай буссар ци чIумал школалул хьхьичI бикIан аьркинссарив.
Хъуннасса дюъ дирхьуну дур оьрчIал нитти-буттахъайгу, ЕГЭ-ду кьамул дуллалисса кIанттурдайн бувагу мабучIари куну. ХIасил, оьрус мазрал ЕГЭ дулун оьрчIан ккаккан дурну дуссар 3,5 ссят (210 минутI). Экзаменнал давугу дарчIуну дуссар кIива бутIуйх, аьмну вай хъанахъиссар 27 задание. Гьашину ва дарсирал ЕГЭ-рал яла лагьмур балданун ккаккан бувну бур 36 балл. Ванияр лагьсса баллах бурувгун, абитуриентътал кьамул буллансса ихтияр дакъассар вузирдахьгу. Цалла хIасиллу оьрчIан кIул хьунтIиссар июльданул 20-нния 23- ннийнин.
