Кулпатрал творчествалул фестиваль

Халкьуннал творчество дуруччаву, му махъа нанисса никирттайн диян даву мурадрай Республикалул Халкьуннал творчествалул къатлул дуллалисса давурттавасса цар «Дагъусттаннал кулпат» тIисса фестиваль.

Гьашинусса «Дагъусттаннал кулпат» тIисса XVIII фестиваль хьунни дистанциялийну, яни манзилданий.


Бадрижамал Аьлиева
Кулпатрал художествалул творчествалул фестивальданул программалувух гьуртту хьунни Агъуллал, Докъузпараллал, Ккуллал, Лакрал, ЦIуссалакрал, Нугъайнал, Сергокъалаллал, УнцIукIуллал, Хасавюртуллал районнаясса кулпатирттал коллективру. Гьарца кулпатрал цала шаппа-шаппа музыкалул инструментирттахун халкьуннал балайрду щаллу буллалисса видеорду ххал дуван, халкьуннал музыкалух вичIидишин бюхълай бур соцсетирдай, РДНТ-лул лажинтирттай.

Лакрал райондалия ва фестивальданувух гьуртту хьусса Мудуновхъал кулпатрал ансамбль сакин дурну дур 2016 шинал. Ансамбльданул художествалул каялувчи – Шагьризада Мудунова. Карин зий ур Гъумучиял Культуралул къатлуву, Шагьризада – Гъумуксса Мариян Дандамаевал цIанийсса искусствалул школалий хореографну, вайннал оьрчIру «Гъази-Гъумучи» ансамбльданул гьурттучиталли.

Ккуллал райондалия фестивальданий гьуртту хьунни Гудовхъал кулпатрал ансамбль, художествалул каялувчи – Халисат Рамазанова. МахIад Гудовлуя къабав­сса, мунал ххаллил­сса чIунийну щаллу буллалисса аслийсса лакку балайрдах вичIи къадирхьусса лаккучу нажагьсса акъа-акъахьунссар.

ЦIуссалакрал райондалия фестивальданий гьуртту хьунни Аьлиевхъал кулпатрал ансамбль. Художествалул каялувчи – МахIаммад Аьлиев. Ансамбль сакин дурну дур 1992 шинал. МахIаммад ва ванал кулпат Роза бур ЦIуссалакрал райондалий­сса аслийсса культуралул центрданул зузалт. Аьлиевхъал ансамбль гьуртту къархьуну халкьуннал творчествалуцIун дархIусса нажагьсса дакъа шадлугъ къашайссар, ЦIуссалакрал райондалий дакъагу, республикалул лагрулийгу.