[dropcap]И[/dropcap]нтнил ва гъинтнил чIун цIу лачIаврия нигьачIаву дусса чIун дур. Гьарица шинах хъанай бур ччюрклицIух ва хьхьичIмур шиналсса кьаркьсса урттуцIух цIу ларчIсса ишру. Миннун багьантту хъанай бур хъуниминнал баччибакъашиву ва мюрщи оьрчIал тIуркIурду.
Жула пикри бакъашиврийну ларчIсса цIу ппив хъанай дур ттуршрахъул квадратный метрардайх. ЦIарал ччучлай дур къатри ва автотехника. Укунсса ишру къахьунтIиссар, агана хъуниминнал лещан къадурсса пIапIирус ягу спичкарду ччюрклил бакIурдайн, дукIурасса кьаркьсса уртту дусса кIанттурдайн къадичларча, хIаз бан, кьаркьсса урттуйн цIу щилащисса мюрщиминнай дюъ дихьларча. ЧIявумур чIумал кьаркьсса урттуцIух ва чIахIлуцIух цIу щилай бур инсантал, инттухуннай ми ччурччуну хъинссар, аьрщи оьргъа шайссар тIий. Ми бяйкьлакьиссар. Кьаркьсса уртту ччурччуну аьрщи оьргъа къашайссар. Нажагьсса хъанай бур ишру кьаркьсса урттуцIух цайми багьантту хьуну, масала, цIупар сававну, цIу ларчIсса.
ЧIявуми ишрурив инсан сававсса бур. Кьаркьсса урттуцIух ларчIсса цIарая хъуннасса нигьачIаву дуссар. ЦIу дагьну ччуччин бюхъайссар вацIри, лухччиний къаххяххан бюхъайссар цичIар. ЦIараву ччуччинтIиссар кюртти, литIунтIиссар лелуххант, жанаварт, ущу-щулгъи. Вай цимурца циланийн дагьаннин гьантIиссар ацIрахъул шинну. Анаварну ппив хьуну нанисса цIу лачIун бюхъайссар вацIрацIух, къилуцIух ва мичча дагьан бюхъайссар инсантал ялапар хъанахъисса кIанттурдайн, пуркIурал загьрулул бан бюхъайссар инсантал, хаснува къюкIлил къашавайми, астма думи.
Инттухуннай кьаркьсса урттуйн цукунчIав цIу щун къабучIиссар тIисса кIанттурду бакъассар. Ва даву дан аьркинссар властрал ва кIанттул цала каялувшиндарал органнал, шяраваллил хозяйствардал ва вацIлул хозяйстварттал идарарттал цачIу маслихIат ккавккун, зарал къахьунсса чараннугу лявкъуну.
Гъилишиву дагьайхту инсантал буклан бикIай цала-цала дачардайн. Дачардайгу ччюрк ччуччин аьркинссар мунин личIи бувсса кIанттурдай. Ва ялагу, кьавкьсса, чIаракIлу дусса погодалий къабивчуну хъинссар къавтIив. Бивчуну бухьурча, лещан къабувну кьабитан къабучIиссар. Бигьа лаган дачардайн, хъу-лухччинив буккайни, хъуниминналгу, мюрщиминналгу цачIу пикри бан аьркинссар цIарая цукун мюхчан хьунссарив. Багъирдавугу ччюрклийн, кьаркьсса урттуйн цIу мащари. Ччюрк бюхъавай аьрщараву дуччияра.
Зува бигьалаглагисса кIанттурдай лещан къабувну макьабитару къавтIи, спичкарду, къалиян. Макьаритару гъаргъсса пюрундалул шушри, цанчирча баргъ тIайлабавцIусса пюрундалиягу лахъан бюхъайссар кьаркьсса урттуцIух цIу.
УрттуцIух цIу ларчIун ххал хьурча, чIарах къабувккун, лещан дувара. Зула гужирайну лещан дан бюхълай бакъахьурча, оьвчияра ххассал байсса къуллугърайн – тел.112.
ДакIний битияра, цIарая мюхчан шаврил тIалавшиннарду къадуруччирча, административ жавабрайн буцайссар. Дишайссар дюъ ягу аьчIа. Укунмасса инсантурай 2 азарунния 3 азаруннийн дияннинсса аьчIа дишайссар. Къуллугъчитурай – 6 азарунния 15 азаруннийн дияннинсса, ишбажаранчитурай – 20 азарунния 30 азаруннийн дияннинсса, идарарттай тIурча – 150 азарунния 200 азаруннийн дияннинсса.
ЛичIлулну бикIияра цIу къалачIун. Ца къахьунмур хьурча, мугьлат бакъа оьвчияра 112 номерданий. Телефон зузиссар хьхьу-кьини къаувкуну. Шагьрулул телефондалиясса дикIу, мобильныйлиясса дикIу оьвчаву украссар.
Б.ХIажиев,
виваллил къуллугърал
лейтенант
ХIадур бувссар
А. Аьбдуллаевал
