[dropcap]Ц[/dropcap]Iуссалакрал райондалиясса Хъунмасса Буттал кIанттул цIанийсса дяъвилул участник Аьвдулхаликь Алимов увну ур декабрь зурул 10-нний 1924-ку шинал. ХIакьину ванан 96 шин дур.

Андриана Аьбдуллаева
Оьрмулул 15 шинаву школагу къуртал бувну, Аьвдулхаликь лавгун ур муххал ххуллий зун. Шанна шинава байбивхьуну бур дяъви. Муххал ххуллул зузалтран, вайннал даву хъуннасса агьамшиву дусса дуну тIий, буллуну бур бронь. Алимовлул бригада хIала бавкьуну бур муххал ххуллул аьралитуравух. Вайннал дузал байсса бивкIун бур фронт гьарица аьркинмунил: ярагъуннил, дука-хIачIанмунил, янналул.

Дяъви къуртал хьуну махъгу цаппара шиннардий Аьвдулхаликь зий ивкIун ур муххал ххуллий. 1952-ку шинал ва увкIун ур зун ЦIуссалакрал райондалул культуралул къатлувун ва цаппара шиннардива муний каялувшиву дуллан ивкIун ур. Цува зузи­сса шиннардий ванал сакин бувну бур хьхьичIунсса художествалул самодеятельностьрал коллектив ва му коллективращал икъавсса кIану къабивтун бур. Цахъи махъ Аьвдулхаликьлул сакин бувну бур ЦIуссалакрал райондалул театр. 1962-ку шинал мунин дуллуну дур М.Чариновлул цIанийсса Халкьуннал театрданул цIа.
Цала оьрмулул хъунмур бутIа Аьвдулхаликьлул хас бувну бур искусствалун ва ларсун дур РСФСР-данул культуралул лайкьсса зузалал бусравсса цIа. Аьвдулхаликьлул бур сурат дишаврил гьунаргу. Ванал коллекциялуву хIакьину 300-ннийн дирсса суратру дур.

Цаппара шиннардил хьхьичI ветераннал цала суратирттал выставкагу дурна. Оьрмулул шиннах къаурувгун, Аьвдулхаликь ичIаллил, ахънил давурттугума дуллан икIай. ВаначIа чан къашай хъамал. Хъихъи ивтун ур ва оьрчIалгу, оьрчIал оьрчIалгу. Уттигъаннурив Аьвдулхаликьлул ичIура ххарисса батIаву хьунни. «Вирттал» тIисса лакрал жагьилтурал ккурандалул вакилтал бувкIунни ветеранначIан сенатор Сулайман Каримовлул чулухасса ца миллион арцул бахшиш буллалисса сертификатращал.
Барча тIий буру ветераннахь Ххувшаврил байран ва чIа тIий буру ванангу, ванал кулпатрангу цIуллу-цIакьшиву.