ЦIаххуйл арс ЦIаххаев МахIаммадзагьируттин
Ттигъанну нязаннивсса бивкIулул жуятува личIи унни ххаллилсса чув, лавайсса даражалул ккарччал хIакин ЦIаххаев МахIамадзагьируттин ЦIаххуйл арс.
Увну ур МахIаммадзагьируттин 1966 шинал Щардал шяраву. Дагъусттаннал паччахIлугърал мединститутгу къуртал бувну, зий уссия ккарччал хIакинну ЦIусса Уренгойрай.
Ххишала акъа дакI марцIсса, аьчухсса, чумартшиву ххисса, гьарнангу бусравсса ия, гъан-маччацириннангу, лагма-ялттуминнангу эбратран ишин лайкьсса инсан ия. МахIаммадзагьируттиннул чаннасса аьпа жул дакIурдиву личIантIиссар абадлий.
ДакIнихтунусса хъуннасса кьурчIишиву кIидачIлай буру ванал кулпатрахь, уссу-ссурваврахь, щала агьлу-авладрахь. Цал рухI Алжаннул ххари даннав! Махъминнал оьрмурдай барачат бишиннав!
Дустал, гьалмахтал,
Лакрал райондалул администрациялул зузалт
ХIажинал душ Жарият Чупанова
Ва мубараксса Рамазан зуруй жуятува личIи хьунни КIундиннал шяравасса ХIажинал душ Жарият Чупанова.
Бувну бур Жарият 1935-ку шинал март зурул 1-нний КIундиннал шяраву.
Ласгу ччяни ивкIуну, оьрмулул 36 шинаву мукьва оьрчIащал ливчIун, ми ччаннай бацIан бан адаминал баймургу буллай хъунмасса захIмат бишин багьну бур Жариятлун. Ванил канилух къадурксса даву дакъар, зий бивкIун бур библиотекалий, машлул давурттай.
Ва бивкIун бур кару мусилсса хъамитайпа. Авурсса накьичру щащайсса диркIун дур лачакирттай.
Жарият бия дакI-аьмал хъинсса, инсаннащал хIал бавкьусса хъамитайпа.
Ва ххирасса бия цинявппа гъан-маччанан, чIахху-чIарахнан.
Жарият аьпалул шаврил кьурчIишиву кIидачIлай, жижара буллай буру душнихь Аьйшатлухь, уссурссуннахь, махъсса гъан-маччанахь.
Имандалий лавгун лякъиннав, алжаннул ххари баннав.
«Лакку билаятрал рухI»
фондравасса дустал
МИХIАММАДАЬЛИЛ ДУШ АЬЛИЕВА МААЬЗАТ
Вай гьантрай мукьцIал лавхъунни Шахьуйннал шяравасса МихIаммадаьлил душ Аьлиева Мааьзат аьпалул хьуну.
Къашавай шанийн багьну, гьантта-кIива къабувнува, хъирив хъап-шап тIий душру ва арсгу кьабивтун, хар-хавар бакъа аьпалул хьунни Мааьзат.
Бувну бур Мааьзат 1941 шинал Шахьуйннал шяравасса ХIасанов МихIаммадаьлил ва ПатIиматлул кулпатраву. Ванил бутта МихIаммадаьли, шяраву ва райондалий хIурмат бусса чув, фронтовик, зий ивкIссар райондалий ххуй-ххуйсса къуллугъирттай. Вайннал кулпат Гъумук бивкIссар. Буттал шяравун каникуллай бувкIни Мааьзат колхозрал давурттай зий бивкIссар, оьрмулул хъуниминнащал ца ххуттай, аьй къадучIанну.
Школа къуртал бувну махъ МахIачкъалалив бивзссар. Бартбисуртту щашлай зийгу бивкIун, гихунмай цила бусса оьрмулий, пенсиялийн букканнин Мааьзат зий буссия Балугърал консерварттал заводрай, га яла захIматмур цехраву. Цила шяравасса Аьлиев ХIамзатлущал ташу бувну, вайннал дянив хьуссар 4 оьрчI: кIия арс ва кIива душ. МахIачкъалалив Октябрьский кIичIиравусса ХIамзатлул ва Мааьзатлул къатраву бухху-букку, хъамал бакъасса кьини къархьуссар. Вайннал къатрал хIаятраву цикссагу гъанчунал хъатIив бувссар.
ОьрчIру дахьва ччаннай бацIлацIисса ппурттуву лас, инсульт хьуну, шанийн агьсса чIумал ацIнияхъайсса шиннардий чан хьун къариртссар Мааьзатлул мунахсса аякьа. Лас аьпалул хьуну шинну ларгун махъ, мура инсульт сававну, оьрмулул аргъираву ивкIусса арснал дардгу духIан багьссар Мааьзатлун. Муниннингу кьадарданул ванин цимивагу оьлусса кьуру бувцIуссар: жагьилсса оьрмулий, апатI хьуну, ивкIуссар ванил уссу – райондалий чIявучин ххуйну кIулну ивкIсса Шакир ХIасанов, махъ – уссурваврал шама-шама жагьилсса оьрчIгу. Амма, дакIниву ци дард-къумашиву дунугу, ялун мудан пиш тIийнмая бикIайсса Мааьзат.
Ккашилнал лякьа, мякьнал кьакьари кIулсса инсан бия ва, ххункI-бурки бувну, къашавайнал, цувалу ливчIнал ялтту буккайва. Ванин хIат-хIисав дакъа ххирая Лаккуялу, интнийн бувккукун, шагьрулия лагайссия Лаккуйн, щарнил лахъний дирхьусса цалла къатравун.
Мааьзатлул бивкIулул кьурчIишивугу кIидачIлай, дакIнийхтунусса жижара буллай буру ванил душваврахь Самаратлухь ва Наидахь, арснахь МахIмудлухь, оьрчIал оьрчIахь, махъсса цинявппагу гъан-маччанахь.
Мааьзатлул рухI хъинний, чурх куклуний хьуннав, бунагьирттал аьпа баннав.
Лавгссарав, бакъассарав,
Буттанний бювхъу хIавий,
Дунияллийн Занналва
Дардру духIан гьан бувсса.
ЦIими ххисса вил дакIнин
Къаша-шайма кIулссия,
ЛичIу-кIичIу канихьну,
Ша хIура къабайссия.
Дакъая виву карчIгу,
Дардирдал ялун ларчIсса,
Бияв лагмаминнангу
Дард духIан лахьхьин байсса.
Дунияллий къаккавксса
Алжан, талихI, тирхханну
Заннал вин пишкаш даннав
Нурданул багъирдаву.
Вин булун къавхьу талихI
Булуннав вия бивзнан.
Дардругу дачIра хьуну,
Шанашу, жул аьзизмур.
Шахьуйннал жямат
Хъуннасса кьурчIишивугу кIидачIлай, жижара буллай буру КIямашрал шяраватусса МахIаммадов Аьбдулкьадир Жабраиллул арснахь, ванал уссу-ссихь, гъан-маччанахь, аьзизсса нину
Залму
аьпалухьхьун лагаврийн бувну. Махънал оьрмурдай барачат бишиннав.
Ниттил рухI алжаннул ххари даннав, гьав нурданул дуцIиннав! Амин!
ГьунчIукьатIрал ккурандалул
чулуха ХIажибутта ХIусайнов
