[dropcap]Ф[/dropcap]еврал зуруй, 1944 шинал ца дяркъусса кьини, даврийн учIайхту, телефондалувух оьвкуну, ЧIаящату баян бувна: «Колхозрал оьллал пирма хьхьурай хъямала дурну дур», — куну. ДачIи ссятравату жу, арула бурттигьу, бавчуру Мазу-Къурух шихунмай.
Карашрал шяравух хьуну, Гьуймигу кьабивтун, ЧIаяхьхьун бивну, колхозрал пирмалийсса къаралчинахь цIувххукун, увкуна: «Кьунну циняв оьллу буссия, кIюрххилнин кIива оьл чанну лявкъунни», — куну. ПирмалучIан гъан хьуссагу цучIав къаккавккун ия. КIул хьуна хъямалашин дакъашиву, бушиву цурк. Ва хъуннасса леххаву гьаз дурну, пирма «хъямала дурунни» тIий баян бувсса шяраваллил советрал хъунаманайнгу ссибивзуна. Колхозрал хъунама Ахха къутаннайн лавгун ия, ганал кIану бувгьусса советрал председательнахь учав: «ХIадур хьу ттущал Уручуллал къушайн ачин», – куну.
Бавцусса оьллал дела ххал дангу УГРО-рал Магьдиевлуйн тапшур дурну, кумагран учасковый Ибрагьимов Зияуттингу кьаивтун, махъмигу зана бивтун шаппай, жу бавчуру зунттал чулийнмай. Шяравату буккайхту, даркьуну цIансса ттурлугу, бивщуну бявкъусса марчгу, дучрайхгу, гьарца затрайхгу кIяласса ганзсса бурсагу бавкьуну, ссихI ласун къашайсса тагьарданийн бивунав.
Цуксса лахъисса духьурчангу, хIинчуралгу дазу дикIайссар, цуксса бирикъаллай лахъи лагарчагу, къачагътуралгу ахир мукунссар дикIайсса.
Жун ва захIматсса аьрххи бансса сававгу укунсса дия. Гай гьантрай Лаващиял НКВД-лул дуснакьравату ливхъун бия Уручратусса къачагътал – Юнус ва Муслин Аьлиевхъул, уссурвал. Гайннаща паракьатну шаппа щябикIан къашайшиву кIулну, ттун щак багьуна, Аьлиевхъан дукия аьркинну тIий, оьллугу гайннан къакIулну къабавцуссар тIисса. Оьллу шяравун буцин къашавай тIий, яла къулаймур кIанттуну чIалай бия гай бивххун лабитан шайсса ШанратIнил ухнилусса, гъинттул Уручуллал заллухъруннал оьллу ябайсса, кIинттул инсан ххал къашайсса, чарттаяту бувсса мюрщисса къатри-къушру.
Жу, гай къушайн биян ца шанна километра лирчIун, Уручулла-БурхIайх нанисса чIумал, дучри пурха тIий, ххиллан бивкIуна. Циривав тIий буна, жул хьхьичIух яларай, кувннил хъирив кув, ларгуна бурцIурдил гьухъала. Ттупанграйн ка гьаз даннин ттуруллувун бахьлавгун махъ дакIнийн багьуна битан къабучIишиву, жува нанисса кIул къахьун. Гай бурцIурдил ттул щак хъиннува мяйжан бувна, бивхсса оьллал дикIул кьункьай най бухьунссар тIий. ЧIал къавхьуну бивру къушачIан. Лагьну ратIаву ттурлу дакъая, амма 50-100 метралул лахъний, ццунсса ттурлугу даркьуну, дуниялгу цIанну дия. Ливккун, чугу гьалмахчунахьхьун буллуну, циняв къушавух, махIлардавух, лагмасса ххяллавух увккун, чувкIуй щак учинсса зад къаляркъукун, нашагу зия хьуну, буртти ивкIун чайгу, ттула гьалмахчунахь учав:
— Утти ина гьантIиссара увкIсса ххуллийх вила шавайн, нагу гьантIиссара ва ШанратIух лавай ттула буттал шяравун Ккуцив. Гъумукунсса ххуллу ттун шихачин гъанссар Карашахнияр, — куну.
Ттул гьалмахчу, нигьа увсун: «Яр, ва чIумал вай зунттавух инавалу лагайссарив, ина авлияссарав?» — тIий, ттулсса буллалисса куна, гъалгъа тIун ивкIукун, учав: «Ина ттулсса мабара, инавагу нигьа маусара. Вихьгу пIякь учайсса ярагъ бур, барцIру хьунабакьирча, битан. Къачагътуран ина аьркинну акъассара», — куну.
На авчура ттула ххуллийх. ОьрчIни нава ша къабивзсса кIану бакъасса, чаннай нанисса чIумал я батIин къашайсса ххуйсса ххяллу, нухру дусса бюхттулсса зунттал бакIру чIалачIисса, кия чулух яла лахънин СалибакIугу бусса ШанратIух нанийни, ттуруллувун гьарзат дахьларгун, маркIачIан бизан гъан хъанай, цIангу дагьлан диркIукун, шиккунгу ивну, цичIар ххал къархьунура гьантIиссарав тIий, оьрчI заманагу дакIнийн багьну, щугълурдаву най уссияв.
Аьраб элмулуву дуссар тIар ца дуаь, агар лахъсса зунттуйн лавхъун, щилтагъ къахьунну дуккирча, дакIниймур бартлагайссар тIисса, дуклай уна гъалатI итххяххарча, тIайлабацIу къашайссар тIисса. Му куццуй, щугълурдаву ттула бидлийгу бурттий най, Винтливаллил дарагу кьадиртун, Хъун-Нухлил хьхьичIун иян ца 300-400 ша ливчIсса чIумал, хьхьичI най ххал хьуна кIия загълунсса адимина, шинеллугу, къуттакьяпригу, бурчул усру ва дулагъругу лархсса. Арамтурал диц-куц, бусаврийн бувну, Аьлиевхъаха лащайва, амма ярагъ чIалай бакъая. На куртIну пикрилувунгу агьну, балглай ура: «Тай ца бикIантIиссар? Аьрххи-ххуллий нанисса ххуллулсса бачайсса кIанугу, чIунгу ва дакъари. Къачагътал бивкIссания, Лаващату лавсъсса ираннал лахъи ххювабитулт чIалай бикIанссия. Къачагътал бакъахьурча, тай цари бикIантIисса? Ва чIумал вай зунттаву, жанавартру бакъа, инсантал къабикIайхха тIий, пикрирдай уна, гай бахьлавгуна тамур хъачIнихун. Тих кIибачIлай бия на гьан аьркинсса ххуллугу, Хъун-Нуххулунмайсса ххуллугу. На най уна пикри буллай ура: агар нава гьансса ххуллийх бачирча, тай ххуллулссар, нуххулунмай кIура баерча, тай къачагъталли тIий. Агар тай къачагътал бушиву балжину кIулну бивкIссания, му бия чIа кусса мурад: ххал шайхту, ливккун чаяту, бивтун ца увтун, кIура аяннин гамагу утан бюхъанссия. Агар тай бухьурча тахсир бакъасса ххуллулсса? Му бакIрайн ласун бюхъайсса бала бакъая.
На хъачIниха ливчукун, ттул хьхьичI цучIав акъая. Тай кIура бавну бия нуххулунмай. КIа ххуллу бизанттуйн бувккун, ттун кIай чIалай бакъая. Утти на ачинсса ххуллу бия кIайннал хьхьичIух. Хьумур хьуссар куну, таваккулгу бувтун, Ччитул-Бизану учайсса бизанттуйн лахъан бакIлавайсса гъявгъа чарттал бувгьусса жегъирххуллийх авчусса чIумал, ттула урчIа чулий, Хъун-Нухлил хьхьичIсса бизанттуй, цакуну на ххал хьусса къачагътурал, хьхьичIух ялавай зурчIайтIи бувну бивкIсса ттупангругу гьаз бувну, ттуйн бувгьуну, чIаравсса хъунмасса кьунттухун багьну, ишангу ларсун, бавцIуна.
Ттун, ттула ххуллийх ачаву бакъа, цамур бансса бакъая. Цаппара секундирттал дянив, бизанттуйн лавхъун, ттуруллувунгу ахьлавгун авцIуну, пикри буллай уна, бавуна «Хъирив цучIав акъари» кусса цаннал махъгу, «Цувалу най ивкIссарив?» кусса гаманал махъгу. Вай ттуярва нигьа бувсун бурча куну, сивсуну нагу учав: «Да Юнус, къабизар хьурав лаикIлай, на навалу ура. Ачу жува хьунабакьиннуча, вин ччиний, ччитари, винма ттуяту кумаг ччарчан», — куну. «Гьассар цал хъяврин увссара, ххишала на щийнкIуй къавихссара», — куна жавабран. Мукунгу куну, кьаагьуна.
Цала виричушиврия хаварду буслансса «вирттал» чIявуссар, бувсмуниву гъалатI лякъинмигу хъиннува чIявуссар, нигьа къаусайсса инсангу къаикIайссар. Ттул маччачу, хъинну виричусса инсан, Сулайманнул учайва: «Нигьа къаувсъсса адиминаща виричушиву дан къашайссар», – куну. Нагу кIия цIа дурксса къачагънал кIива ттупанграл вяра ттуйнма тIайла бувну, 70-80 шаттирал манзилданий кьунттухунгу багьну, ишан ласайни, нигьа къаувсра чирча, авлиясса икIан аьркинна. Амма нигьличIа аьркинмур ссавурди, му тIурча, ттучIа такIуй чан къархьуссар. Найбуна къабивтукун, ттул дакI дарцIуна тайннал ттуйнма къабитаншиврий. Къабитаврил савав цияв къакIула. Ххюра минутIрал хьхьичI, тай ттухьхьунма биривну буна, нава къабитаврил савав чIалай дур, амма утти, нава тайннахьхьун иривну уна, ттуйнма къабитаврил савав, ттул хIисаврай, диркIссар, ттул хъирив чIявусса цаймигу бусса ххай, гьанавиххул шаву.
Утти бусанна ца бивкIссарив тай Аьлиевхъул. Тайннал бутта Аьвти-Аьли ттун ккавкссия оьрчIсса заманнай, жула чIаххувраннийн хъамалу увкIсса чIумал. Га ия хъинну загълунсса, хханххагу, дарвачгу личIи бан къашайсса, буртти ивкIукун, чал бархI лахIлахIисса, чIявусса яттил заллу, Уручрав махъ заназисса авадан адимина. ОьрчIаяту ттун цичIав къабавссар, 1941 шинал июльданул 11-ннийн бияннин. Га кьини, Ахъушату оьвкуну, НКВД-лул начанник Сурхаевлул Ккуллал райондалул НКВД-лийн баян бувна: Уручратусса кIия уссу, Аьлиев Юнус ва Муслин, ярагъуннилгу балгуну, жул зузалтраща бугьан къавхьуну, зул чулийнмай лавгунни», — куну. Дяъви байбивхьусса чIумал, душманнал аьрал анаварну жула чулухунмай бавчукун, жула дустал ва душмантал личIи хъанан бивкIсса чIумал, Юнус ва Муслингу кIанттул хIукуматрайнгу мютIи къавхьуну, хьхьичIва хIадур бувну бивкIсса ярагъгу бавхIуну, цивппа жула душмантал бушиву чIалачIи бувну, лавгун бия га кьини къачагъшиврий оьрму бутлан, душманнал аьрал жучIанма бияннин, яла зана хьуну, хъуни къуллугъру бугьансса пикрилий. 1942-кусса шинал, кIа ттун цивппа хьунабавкьусса Маччайнна-Зунттуйсса лакрал яттил ттурзанну хъямала дуллай бур тIий, хъирив бувксса лакрал НКВД-лул начанник Кауров бакIчисса оперативнай группалущал, гьаман, га Шан-РатIнил ухнилусса Уручулла-БурхIай хьусса бита-ххитавриву гайннал бивтсса ттупанграл ккулла щуну бивкIссар, армиялуву ттущал ивкIсса, хьхьичIунсса дуснайн МахIаммадов ПаттахIлуйн. Га шинал ахирданий, жула аьралуннал Сталинградрай душманнал аьрал вив лавсун ххит бувну, Ухссавнил Къапкъазнаватугу душмантал лихъан бувну, нимиц жучIанма къабияйшиву бувчIукун, къачагътуралгу пикри бувну, жула органналгу политика даххана дурну, канийн бувкIми дуснакьрайн къабавкьунма битлатисса закон (легализация) дуккан дурукун, Аьлиевхъулгу легализовать хьуну, ярагъгу цахьва битан икьрал дурну, аьчухну занай бивкIссар, сант дагьаннин бивтун. Канийн къабучIарча, цанма я ненттабакIрайн ккулла, я ссурссулухун бутIа бакъа цамур бакъашиву кIул хьувкун, чансса бухьурчагу цала масъала куклу бан ччай бивкIссар. Га чIумал укунсса чIявусса бивкIссар. Аьчухну занай цаппара хIал лавгсса чIумал, кIул хьуссар Уручрав лаикIлай ушиву немецнал агент – парашютрай увтун махъ цала буттал шяраву яхъанахъисса ХIасанов, Аьлиевхъащалгу хIалашиву дусса. ХIасанов лаивкIсса къатри кIул бувну, ца кьини кIюрххила бувкIун Дагъусттаннал НКВД-лул зузалтгу, Ахъушиял НКВД-лул зузалтгу, лагма рургьуну, баян бувссар, ххюра минутIравату каругу ларай дургьуну кьатIув къауккарча, къатри пIякь учин дурну, цувагу гайннул лув личIаншиву. Парашютист ХIасанов увкссар. ГаначIа лявкъуссар нимицнал рация ва шифра, ярагъ, чIярусса арцу ва цаймигу аьркинсса затру. Увгьусса парашютист увцуну сельсоветравун, баян бувссар: «Жула душман хьусса шяравучу ккаккан нани», — куну. Ца-цаних итабакьлай, кувннал пув тIий, кувннал нааьна дуллалисса чIумал, цанма цичIав къакIулми хьуну, Аьлиевхъулгу бувкIун, кIиягу архIал уххан кьаст дурукун, ца акъа къаитаавкьуну, ганал хъирив нуз лакьайхту, хьхьичIара дурсса икьралданийн бувну, советравун увхма гивусса зузалтрал, шихва авцIума шихсса зузалтрал увгьуну, ярагъгу зевххуну, парашютистнащал архIал машиналий щябивтун, Ахъушав биян бувссар. Парашютист гара кьини тIайла увкссар Анжилив. Аьлиевхъул, Ахъушав аьркинсса цIуххавугу дурну, хъирив гьантрай биян бувссар Лаващун, цила кьяйдалий Щурагьун дуснакьрайн тIайла букканшиврул. Лаващиян Аьлиевхъал гьунарду къакIулну бивкIун, ца хьхьуну циняв даврияту шаппай лавгун, КПЗ ябуллай ца милица акъа цучIав акъашиву кIул хьуну, Аьлиевхъал милицанащал ихтилат бачин бувну бур: «Ва щалва идара ябуллай ина нигьа къаусарав? Ина кьянкьасса адамина ухьунссара», — тIий. Яла увкуну бур: «ЖучIа шархьсса чулу дикIул дарваг зия хъанай бур, вилния оьрчIру, кулпат бухьунссар. Ласи ва дарваг кIайннал букан», — куну. Милицанал нузаяту кьункьула хIура дайхтугу, цала янналул бувцIусса дарваггу кIинузавун бириян бувну, хъап куну хъарая увгьуну, милицагу КПЗ-лувун ххюрхху увну, кару ва ччаннугу хIадур дурну диркIсса энттай дархIуну, кьацIливунгу аццул чIутI бавкьуну, кIюрххил увкIукун начанникнахь жул ссаламгу буси увкуну, дикIуятугу ссунтI учинссарагу къадуллуну, ганал жипливусса кIулли ларсун, ярагъ бусса къатта тIивтIуну, кIива ираннал лахъисса ххювабитугу, чIярусса пIатIруннугу, ганал наган ттупанчагу лавсун, цала дарваггу хъарайх бивщуну, рахIатну лавгун бивкIссар цала зунттавунмай.
Муна ми гьантрайри къачагътал ттуйн бакIрайн багьнугу бивкIсса. Гайннаятугу личIи хьуну, къащилул ттула нава кьуцIу уллай, Аьли-Зунттул бизанттайх ачиннин, дагьайсса куццуй цIангу дагьну, ттула даврил кьимат бищун къулайсса чIун дуркIун дия. На пикри буллай ура: «Чаннан цIарал дарцIайссар, чарттацIух цIу лачIайссар, амма инсаннал хасият даххана дан къашайссар» тIисса ттула хъуна ттаттал махъругу дакIнийн бичлай, циксса ккавккун махъра навагу аххана хьунтIисса тIий, ттуйна нава ссибизлай ура. Циванни нава цама зузала ттущала къаувцусса, цамур бакъахьурча, ккавкмунил барашиннарагу данссияхха тIий. Мугу Аллагьнан кIулли, цукун хъинну бивкIссарив. Ми пикрирдай уна, ивунав буттал шяравун.
Хьумур бусарча, ттухунма буттагу, ссурвал ва уссугу дяъваншиву кIулну, цичIав къавхьусса куна уна, кIул хьуна га хьхьуну кIай Аьлиевхъал хъами кIирагу душиву гьантта цала хъамаллуранний. КIюрххил, гай нанисса чIумал, ккурчIав хьхьичIун увккун, учав: «Лахьхьу ттун хьунабавкьунни зул арамтал — Юнус ва Муслин. Мяйжанссар, битан хIадур хьурчагу, кIайннал ттуйн къабивтунни. Бюхъай мукунсса хьунабакьавуртту ттигу хьун. Гьарца чIумал рахIатну къуртал къашайссар, зу кIайннахь учара, ттущал хьунабакьира куну, рязи хьурча, ттун баян бара».
Даврийн зана хьувкун, хьумур гьарзат чивчуну Маркаряннуйн, ихтияр дула куссия, 10 гьантлийсса ца участковай Мужагьидлущал кIай зунттаву къачагътуран луркIан дурну, бугьан. Ттул чагъарданий Маркаряннул чивчуну бия: «Тов. Таутиеву – сообщите Гасанову, что этим занимается Акушинское РО НКВД, а Гасанова иметь в виду в дальнейшем».
Цаппара барзру лавгун махъ, Уручратусса ттул буттал хъамаллурал арс Ризван ивкIссар КкутIнишавсса цала хъув гъайтIий. ГаначIан бувкIун Аьлиевхъул, бахчилай бивкIун бур: «Ина жу литIун ярагъгу лавсун занай усса урахха, чув бур му ярагъ?» — тIий. Ризваннул на зу литIунна тIий лавсун занан зу ттул душмантал бакъарухха, истребитель уну тIий буллусса ярагъ шаппа буссар, нани ттущал на ккаккан банна кувкун, ганал даву къуртал хьуннин бавцIуну бур. Къуртал хьуну шаппай най, Уручуллал бурхIайн лавхъукун, Юнус лавгун ур лавай. Муслин, уссугу манарда тIий уна, лавгун ур Ризваннущал. Шяравун биявайсса чIумал, Муслин цаятува цува цIарду дуллай ивкIун ур, щялу къавхьуну ттупанг битайссар тIий. Ризваннул: «Хъинсса битул та бюрх бутайссар», — куну, Муслин «бюрххух луглай» уна, бивтун бакIрайн, га унийва увтун кьаивтун, шавай лавгссар. Ахъушату бувкIун, Муслиннул кьаркьала миккура дурччуну диркIссар. Юнуслул, хьхьувай лавгун, ппив дурну гьавгу, лавсун уссу цала Уручуллал хIатталлий увччуссар. Юнусгу ливчIссар цувалу.
Магъ кьуркьусса шатлун хъама къабитайссар учай. Юнусгу луглай ивкIссар оьттулучу ивчIансса сантирах. Цаппара зурдардивату колхозрал складраяту дарцусса нагьлил фляга ляркъуссар шяравату арх дакъа хъуруннай дурччуну. Га фляга ласун цурку учIаншиву кIулну, хьхьувай къаралданий бавцIуссар милицанал участковайгу, Ризвангу, ца цамагу. Ризван уттуивхьуссар флягалул чIарав, участковай лаивкIссар архну. Хьхьувай нанисса адимина ххал хьуну, Ризваннул: «Да, ина цура?» — кувкун, гаманалгу цIувххуссар: «Инава цура?» — куну. Ризваннул, увчIуну Юнус: «Дуржагьрал цIу ура», — кувкун, дуржагьрал цIу дулунна на вин куну, бивтун га унийва Ризван ивкIуссар. ЧIаравсса участковайнаща къабювхъуссар Юнусгу бивтун утан.
Ялагу цаппара барзру лавгун махъ, Юнус увкIссар шахтталул чIарав ялапар хъанахъисса, цанна кIулсса щарссаничIан. Га увкIшиву кIул хьуссар шахтталул начанник МахIаммадлун. Укканнин къарал бувну, уккайхту, бивтун маузер ччаннайн, Юнус сагъну уна увгьуссар. Хъирив бувкIсса Ахъушиял НКВД-лул зузалтрайн тапшур увссар. Муния махъ ганал бакIрачIан ци бувкIссарив къакIулли.
Цуксса лахъисса духьурчангу, хIинчуралгу дазу дикIайссар, цуксса бирикъаллай лахъи лагарчагу, къачагътуралгу ахир мукунссар дикIайсса.
