Ххувшаврил байрандалул кьини ЦIуссалакрал райондалий дакIнин бивчунни Хъунмасса Буттал КIанттул цIанийсса дяъвилий жанну дуллусса вирттал ва 1999-ку шиналсса дяъвилул иширттаву оьрмулуцIа хьусса милицанал зузалт.

Андриана Аьбдуллаева
Вайннал аьпа абад бан дацIан дурсса гьайкалдануцI тIутIив дирхьунни ЦIуссалакрал райондалул бакIчи МахIаммадхIажи Айдиев, ЦIуссалакрал шяраваллил администрациялул бакIчи Сулайман Рамазанов, виваллил иширттал отделданул хъунама Шакир Нахаев ва райондалул администрациялул зузалт хIаласса делегациялул. Коронавирусрал пандемиялуцIун бавхIуну Ххувшаву ларсун 75 шин шаврин хас дурсса культуралул ва спортрал мероприятияртту ккаккан дан къабюхъарчагу, цIуссалакрал агьали гьуртту хьунни байрандалун хас дурсса цинярдагу Аьрасатнал ва региондалул онлайн-акциярдаву. Цинярдагу ва кьинилуцIун дархIусса флешмобирттавух хIала бувххун, чялишну цала-цала страницардай дихьлай бия райондалул агьали. Онлайн-мероприятияртту къуртал хьунни райцентрданий итадаркьусса байрандалул салютрайну. Шяраваллил жяматрал тамаша бунни салютрай цала чIавахьулттая ва балконная.