[dropcap]К[/dropcap]Iилчинмур барз най бур жула оьрчIахь учительтурал дистанциялийсса дарсру дихьлай. Ва чIумул мутталий шагьрурдайссагу, щархъавуссагу учительтурал хъунма­сса захIмат бивхьунни, оьрчIахь дарсру дишинсса чаранну ххал бигьлай.

Министерствалул къулагъасралугу хъунмурчIин щархъавуми школарду бивкIунни, жагь онлайн-дарсру цукун дишинтIиссарив бувчIин буллай, жагьгу интернетрал ссуссукьушиву дунийн хIадур дурсса дарсру чирчусса флешкарду тIайла дуклай.

Гьашинусса дуккаврил шин школардал партардах щя­къабивкIун къуртал хьун­тIи­ши­вугу вай гьантрай баян бувунни республикалул КIулшивуртту дулаврил министерствалул каялувчитурал. Санитар эпидемиологиялул тагьаргу хIисавравун ларсун, вайннал бусаврийну, школардай дарсру къуртал хьун­тIиссар майрал 25-нний.
ЦIана тIурча, хасъсса къуллугъру жула оьрчIал ОГЭ ва ЕГЭ дулаврийн багьайсса масъалалуха зий буссар.

З. АьбдурахIманова