Жула тарих дакIний битаву мурадрай ва Хъунмасса Буттал кIанттул цIанийсса дяъвилий Ххувшаву ларсун 75 шин шаврин хасну Аьрасатнал Президент Владимир Путиннул хIукму бунни 2020 шин «Хъамакъабитулул ва савлугърал шинну» баян бан.
Андриана Аьбдуллаева
Совет заманнай аьдат дуссия дяъвилул ветерантал ялапар хъанахъисса къатрал чIирттай ятIул цIуку бишайсса.
Ларгсса шинал (2019) Санкт-Петербургуллал Красносельский райондалий дунни «Шикку ялапар хъанай уссар виричу» тIисса жяматийсса акция. Красносельский райондалул дуклаки оьрчIал дянив конкурс баян бувну, хIадур дунни Буттал кIанттул цIанийсса дяъвилул ветерантал ва къинттуллух захIмат буллай бивкIми ялапар хъанахъисса къатрал чIирттай лачIун дансса лишан.
Красносельский район ляличIисса районни. 1941 шинал шикку бацIан бувну бивкIссар бачIи Европа бивтсса вермахтрал аьрал. Ва аьрщарай 1944 шинал байбивхьуссар душманнайн гужсса гьужум бувсса ва блокадалул шалкка буцари бувсса Красносельско-Ропшинский операция.
Жула тарих хъамакъабитаву ва ялун нанисса ник Ватан ххирану тарбия даву мурадрай, Санкт-Петербургуллал Красносельский райондалул опыт щалагу Аьрасатнавух ппив баву къулайну чIалай, ПаччахIлугърал Думалул комитетрал хIукму бунни субъектирдал бакIчитурайн, «Юнармия» тIисса оьрчIал ва чIаважагьилтурал жяматийсса патриот суккушиндарайн баян бан му акциялул лагрулий личIи-личIисса патриот мероприятияртту бартдигьин.
