Сулайман Мусаевлул сакин бувссар «Лакцы-авиаторы в Великой Отечественной войне» тIисса лу. Му луттирайн дагьну дакъая жул
ЧIурттащатусса летчик, дяъвилул гьурттучи Аьлиев Каримуллагь Къушил арснал цIа.
Хасаврай 1953-ку шинал педучилищалуву дуклай буссияв жу, ЧIурттащатусса кIия оьрчI Ханов Сайпуттингу, нагу.
[dropcap]З[/dropcap]уруй цал тIиссакссагу, бигьалагай кьини Сайпуттин лагайва Грознай шагьрулийн цала буттал ссурахъу Аьлиев КаримуллагьлучIан иян. Муния махъ ттун Каримуллагьлуя цичIав балжийсса къабавссия.
Вана утти жула «Илчи» кказитрай бищуншиврул ттучIан лавсун увкIунни мунал документру Каримуллагьлул уссил арс, къуллугъ кьабивтсса майор, хъунмасса хIаллай Каспийскаллал горвоенкоматрай зий ивкIсса Аьлиев Залимхан Мусал арс. Ялавай кутIану кIицI банну ми документирттал бусласимур.
Аьлиев Каримуллагь Къушил ва Бавал арс, 1919-ку шинал увсса, армиялийн увцуну ур Бакуйсса летчиктурал училище бувккуну махъ, 1942 шинал. Цаппара хIаллай аьдат уллайгу ивкIун, тIайла увккун ур фронтрайн. Гьуртту хьуну ур, ччарча цалалу, ччарча цайминнавух гьурттуну душманнал самолетру кьатI давривух. Ларсун дур ЯтIул-ЦIукул орден ва чIярусса медаллу. Талай ивкIун ур истребителлай, ссавнийн гьаз хьуну ур 210-ийла (боевые вылеты). Аьрая занахьуну махъ нину-ппу Новолакрайн бизан бувну лявкъуну, му цува миналул хьуну ур Грознайлий, 25 шинай зий ивкIун ур Грозналлал гражданский аэропортрал начальникну.
ИвкIуну ур цалчинмур чачаннал дяъвилий. Ялув кIицI бувсса луттирайн Каримуллагь къаагьавугу Дагъусттаннай яхъанай къаивкIун тIий бухьунссар, лях лавгхьунссар. Аьпа баннав цал.
Каримуллагьлул уссу Аьлиев Муса Буттал арс. 1903 шинал увну ур ЧIурттахь. Гъумук райвоенкоматрал фронтрайн тIайла уклакисса ппурттуву, буттан цIа цур куну цIувххусса чIумал («как зовут отца» куну бухьунссия оьрусрай) оьрус маз анжагъну бакъа къакIулссия оьрчIал «бутар» куну бивкIун, чагъарданийн ларсун диркIун дур Буттаевич тIисса цIа.
Мусагу кьянкьа-кьурчIисса, итххявхсса жагьил ивкIун ур. Му агьну ур инженер-сапертурал батальондалувун.
Щала дяъвилул ххуллу ваналгу, уссил кунма, бивтун бур душманнал аэродромру, эшелонну, складру пIякь учин буллай. Ми иширттаву хьхьичIунсса уну тIий Мусал хIалал дурну дур ЯтIул ЦIукул орден ва медаллу. Ванал документирттаву бур Сталиннуятусса барчаллагьрал чагъаргу, «За победу над Японией» тIисса медальгу. Ванал характеристикалий чивчуну бур укунсса ххару (вай жува ласунну оьрус мазрайва): «Смелый и энергичный боец. В боях отличается хладнокровием и выдержкой. В Японии отличился в операциях на Зеландском полуострове. Обеспечивал пропуск боевых порядков наших войск под огнем противника, обеспечил разминирование маршрута, при этом ночью снял и обезвредил за 45 минут противника. Тов. Алиев опытный сапер. Прошел пешком свыше 1200 километров по безводнопустынной местности Маньчжурии с выполнением боевых задач. В районе западнее «Учагоу» получил задание разведать два объезда для колесного транспорта. Работая после тяжелого форсированного марша, пренебрегая усталостью, тов. Алиев ночью указанные объезды разведал, оборудовал к утру их указками, тем самым ликвидировал образовавшую пробку наших войск».
Мусайн кIийлла-шамийлла щаву дирну диркIун дур, контузить хьуну ур. Мунияту бухьунссия, шавайн увкIун шиннагу къаларгун, аьпалул хьуну ур. Аьпа баннав ваналгу.
ХIусайн Давыдов,
ЧIурттащи
