Инттухъунил давуртту

Мартрал 21-22-нний ДР-лул шяраваллил хозяйствалул министрнал 1-ма хъиривчу Шарип Шарипов ивунни Дарбантуллал райондалийн инттухъунил давуртту нанаврил хIалкьазия ххал буван.

Мунащал архIал ивзунни райондалул шяраваллил хозяйствалул управлениялул хъунама Юсуп Гарайханов, «Минмелиоводхоз» ФГБУ-лул каялувчи Валкип Кьурбанов, Дарбантуллал райондалул бакIчи Фуад Шихиев ва цаймигу.


БакIрайва ми бивунни «Татляр» МУП-райн, микку ххал диргьунни къюмайтIутIул багъирдаву дуллалисса давуртту.
Яла бивунни Музаим тIисса шяравун. Микку лакьлай бур ччяни шайсса ахънилсса, дугьлай бур интту хъуру. Миккува хъузалтращал цачIу ххал бивгьунни захIматшивуртту хьунадакьлакьисса масъаларттугу.

Дарбантуллал райондалул администрациялул къатраву дурунни цаппара муниципал районнал бакIчиталгу гьуртту­сса батIаву, миккунма оьвкуну бия кьиблалул муниципал районнал хозяйстварттал каялувчитурайнгу, мелиоратив системарттал управлениярттал хъуниминнайнгу.

Ххал бивгьунни дишайсса щин диялну дакъашиврул ма­съала. Шарип Шариповлул тапшур бунни дусса щин шайссаксса мюнпатну ишла дуван, ишла дуллан кIунтIайтIи щин дихьлан (капельное орошение), агротехнологиярттал тIалавшинну дуручлан.