Республикалий ца яла жагьилма министр

ЦIуну ивтсса каялувчинацIун цIу-цIусса умудру бахIлан бикIару жува. Хъунма хIал къавхьунни Дагъусттан Республикалул экономикалул ва территориал лябуккулул министрну ивтун Русланнул арс Султанов ХIажи. Ва цувагу цала ниттил мазгу, миллатгу ххирасса патриот ур. Хьунни ваналгу, жулгу дянив аьчухсса ихтилат.


— ХIажий, ина ура жула республикалул министиртурал дянив оьрмулул ца яла жагьилма. Цукун бювхъур жагьил­сса оьрмулий му даражалийн иян, му къачIивисса къуллугъ хIалал бан?

— ХьхьичIва-хьхьичI дакIних­туну барчаллагь учин ччай ура «Илчи» кказитрал рекдациялухь ттуйнма шиккун оьвчаврихлу. Дагъусттаннай бакъа­ссагу, шаннагу лакрал райондалий хъанахъимуния, миллат­рал багьу-бизулия, язисса арс-душваврая бусласисса хъунна­сса даву дачин дурсса бур жулва кказит. ДакI ххари хъанан дикIай, республикалий хъана­хъисса агьамсса мероприятиярттай «Илчи» кказитрал зузалт ххал шайхту. КIицI лаганна цуппа кказитгу буккултрал дянив сий дусса тIалавсса бушиву.


 

Русланнул арс ХIажи Султанов.
Увссар 1977-кусса шинал ЦIуссалаккуй Шушиннал шяраву.
1999 шинал къуртал бувссар Дагъусттаннал паччахIлугърал университет («финансру ва кредит»).
2001-2006 шш. – ДР-лул Финансирттал министерствалул ЦIуссалакрал райондалийн багьайми ишир­тталсса буллалисса управлениялул каялувчи.
2006-2007 шш. – ДР-лул Президентнал Контрольно-финансовый управлениялул отделданул начальник.
2007-2013 шш. – ДР-лул Президентнал Контрольно-финансовый управлениялул начальникнал хъиривчу.
2013 ш. – ДР-лул экономикалул министрнал цалчинма хъиривчу.
2014 ш. – ДР-лул экономикалул ва территориал лябу­ккулул министрнал хъиривчу.
2017 ш. – ДР-лул экономикалул ва территориал лябу­ккулул министрнал цалчинма хъиривчу.
2019 ш. – ДР-лул экономикалул ва территориал лябу­ккулул министр. Дагъусттан Республикалул паччахIлугърал мяйжаннугу­сса 1-мур класс­рал советник.
Дагъусттан Республикалул лайкь хьусса экономист.


 

2006 шинал, Республикалул Президентну Муху Аьлиев авцIусса чIумал, «Дагестанская правда » кказитрай баян бувну бия ДР-лул Президентнал администрациялийсса финансирттал ва бюджетрал хъунама язи угьлагьисса конкурс. ЛичIину хъунмасса умудгу бакъанува, хьумур хьунссар куну, му конкурсравух гьуртту хьунсса аьрза буллуссия нагу . Хъунма хIал къавхьуну, президентнал администрациялийн оьвкуну, цIувххунни цуксса чIун аьркинни, цIанасса вилла давугу тапшур дурну, администрациялийн зун учIан куну. Гьай-гьай, махIаттал къабизан­сса ишгу бакъая. Муна мукун, агьссара на Президентнал администрациялийн.
Ларгсса шинал ноябрь зуруй ттуйн тапшур бунни Респуб­ликалул экономикалул министр­нал къуллугъ. Му бартбигьлайгу ура, ттула бюхъу хъирив лаллалиссаксса.

— Ина каялувшиву дуллалисса министерство, жул пикрилий, хIисав хъанай бур республикалий ца яла кьювчуми, захIмат-жапами масъалартту бартбигьлагьи­сса къуллугъран. ХIучI къаучарав, нигь дакъарив дакIниву?

— ТIайлассар, бувчIлай бур ттуйнна тапшур дурсса даврил жаваблувшиву ххинугу хъуннасса душиву. ХIакьинусса кьини нава даврин харж буллалисса гьарцагу лахIза мюнпат буну ишла бан хIарачат буллан икIара. Махъ бакъа, ттул даврийн хъар хъанахъиссар республикалул оьр­му хьхьичIунмай шаврил, агьалинал багьу-бизу къулай шаврил тагьар. Му ба­къассагу, жул министерствалул жаваб дуллалиссар щала республикалулгу, кIантту-кIанттурдайсса муниципал сакиншиннардалгу экономика хьхьичIуннай даву мурадрайсса масъалартталгу.

Республикалий буссар экономика ва социал иширттал агьамшиву ххишала дакъа хъуннасса предприятияртту дусса кIива шагьру – Каспийск ва Дагестанские Огни. КIулсса куццуй, ми шагьрурдайсса предприятиярттай зий бивкIссар цикссагу азарахъул инсантал. ЦIанасса чIумал жу хIарачат буллай буру, ми зузи кIанттурду ябаву ва чIяву баву мурадрай, инвестициярттал площадкартту тIитIин. Масалдаран, Каспийскалий бу­ссар «Уйташ» тIисса инвестициярдал площадка.


— ХьхьичIра-хьхьичI зун­ттал щархъурду дузал дан багьлай бур инфраструктуралул. Агана шяраваллаву багьайсса куццуй­сса школарттугу, садик­ругу, щинаххуллурдугу, газгу бакъахьурчан, гьай-гьай, хъинну захIматссар, мукунсса шартIирдай ялапаргу хъанай, экономикагу хьхьичIуннай дуллан.


Тикку буллай байбивхьуну буссар стекловолокнорал ва полиэтилендалул заводру. Гьашинусса шинал ми заводру, къурталгу бувну, хутIливун бутансса умуд бу­ссар. Тиккура дайдихьлай дуссар алкогол дакъасса хIачIия итадакьаврил ва дикIул продукциялул заводру зузи баврил давурттугу.

— Ци тагьарданий буссар хIакьину Каспийск шагьрулий­сса «Кристалл» тIисса индустриал парк?

— «Кристалл» — му цивппа заллусса ихтиярду дусса индустриал парк хъанахъиссар. Байбихьулий налогру дулаврил чIярусса куклушиннарду кка­ккан дурну душиврийн бувну, чялиш буклай бур миккугу хайр-мюнпат бусса производстварду тIитIавриха зунсса инсантал. Мунияту чIярусса куклушиннарду ккаккан дурсса инвестициярттал лагрулий зун бучIан ччисса сиптачитал ва ишбажаранчитал гьарзану бур.
Ларгсса шинал, Дагъусттаннал БакIчинал тIалавшиннарайн бувну, «Дагдизель» заводрал ишла къадуллалисса аьрщарайгу индустриал паркру сакин бансса хIукмурду кьамул барду. Тикку дия ацIрахъул шиннардий ишла къадуллай бивкIсса аьрщив.

— Жула зунттал районнайсса экономикалул тагьар цукунсса дур, цу-цуми бур хьхьичIххуттай бартбигьин багьлагьими мурадру?

— ХьхьичIра-хьхьичI зун­ттал щархъурду дузал дан багьлай бур инфраструктуралул. Агана шяраваллаву багьай­сса куццуйсса школарттугу, садикругу, щинаххуллурдугу, газгу бакъахьурчан, гьай-гьай, хъинну захIматссар, мукунсса шартIирдай ялапаргу хъанай, экономикагу хьхьичIуннай дуллан. Районнайсса инженериялул инфраструктура сакин даву хIисаврайн лавсун, хьхьичIсса шиннардих бурувгун, гьашину­сса шинал бюджетравун ххишаласса арцу итадаркьуну дуссар.

Ларгсса шинал жу дачин дурну буссияв «Мой Дагестан», «Моя вода», «Комфортная городская среда» тIисса агьамсса проектру. Вай проектирдавун духлахиссар зунттал районнай дуллай бивкIсса щинал объектру. ЦIанасса чIумал зунттал шяраваллаву яла цIурувкьюмур бур газ буцаврил масъала. Гьашинусса шиналсса бюджетрай хIисаврайн ларсун дуссар Лак­рал, Ккуллал, Рутуллал ва Агъул­лал районнайнсса газ буцаврил давуртту дайдишин. Ва масъалалул ялув чялишну зий буссар Промышленностьрал министерст­во ва районнал администрацияртту.

— Ца яла захIматсса, бизан баврил масъаларттацIун дархIусса тагьар дур ЦIу­ссалакрал райондалий. Мунил хIакъираву ци чин бю­хъанссар ви­ща?

— ХIакьинусса кьини Респуб­ликалул хъунаманал хъунна­сса къулагъас дур га райондалул масъаларттах. Ухссавнил Ккав­кказуллал иширттал министрнащал кьутIигу дурну, байбивхьуну буссар Шушив, Гьамияхь ва ДучIив оьрчIал багъру буллай. Ми бакъассагу, дуллай буссар ххюра шяраву канализацияртту. Яла муния махъ ххуллурдалссагу буллантIиссар. Жугу жула чулуха чIарав бацIан хIадурну буру.

— ХIажий, даврийн кьамул бува тIий бучIайсса чан­сса бакъахьунссар, хаснува лакрал чулуха, винма кIулминнал цIания…

— Ттул пикрилий, мукун инсантал даврийн кьамул буллан къабучIир. Нава ва къуллугърай авцIуну махъ Дагъусттаннал университетрал деканнайн оьвкуссия, бурив вичIа ххуйну экономикалул факультетрал вуз къуртал бувсса инсантал куну. Университетрава ттучIанма тIайла бувксса выпускниктурал дянив конкурс баян бувну, на яла язи бувгьуссия хьхьичIунсса пишакартал.

— ХIакьинусса жула лак­рал тагьарданух бурувгун, вин мадара итххяв­ххун кIулну бур ниттил маз. Му къаххари хьун­сса ишгу бакъар. Цуксса куртIну кIулли вин вила тухумрал нясав? Ив­ссарав ина Лаккуйсса вила буттал шяравун, кIа диркIсса кIанттайн?

— На хъуна хьуссара ЦIу­ссалаккуй Шушиннал шяраву. Ттул бур мукьва оьрчI. Ттул ппу ур Шушиясса, буттал нину ТтурчIиясса. Ттаттан шанна шин хьусса чIумал, нину-ппу ливтIуну бия. Буттал ниттил чулухассагу бур биялсса тухум. Кьулку шиннардил дайдихьулий Шушиннал шяраву диркIун дур 35-40 хозяйство. Ивра на кIийла-шамийла ттула буттал бутта­хъул бувччусса миналийнгу, аьрщарайнгу. Уттигу пикрилий ура ттула оьрчIащал архIал иян, бу­ттал буттахъул чув ялапар хъанай бивкIун бурив кка­ккан бан.

-Барчаллагь, ХIажий, вила дусса, дакъа­сса чIумухгу къаурувгун, жул «Илчилийн» хъамалу учIаврихлу, був­сса дакIнихтунусса, нахIусса ихтилатрахлу. ТIайлабацIу баннав вин, кабакьиннав вил мурадирттацIун Занналгу!

Ихтилат бувссар
Руслан Башаевлул
Чивчуссар Имара Саидовал

Читайте также: